Алматы Kazakhstan Fashion Week 39-шы маусымы басталды,-деп хабарлайды "Shalqar.kz". 

Алматы қаласында еліміздің басты ұлттық сән апталығы - Kazakhstan Fashion Week (KFW) 39-шы маусымы өз жұмысын бастады. Биылғы маусым төрт мемлекеттен (Қазақстан, Ресей, Қырғызстан, Өзбекстан) келген 22 дизайнердің басын қосып, заманауи сән мен креативті индустрияның жаңа тенденцияларын ұсынады. Сондай-ақ шара аясында Aida KaumeNOVA сән үйінің 20 жылдық мерейтойы мен француз модельері Ив Сен-Лоранның мұрасына арналған арнайы бағыттар қамтылған. 

Апталық аясында сән индустриясының өзекті мәселелері, креативті экономика, халықаралық ынтымақтастық және жасанды интеллект технологияларын талқылайтын арнайы дискуссиялық алаң (Public Talk) мен Fashion Stream білім беру бағдарламасы жұмыс істейді. Дискуссиялық алаңда Саят Досыбаев, Алина Гуторева, Аида Кауменова, Жибек Зенгир, Ельжан Кушекбаев және Адиля Ботабаева сияқты белгілі сарапшылар мен дизайнерлер өз тәжірибелерімен бөліседі. Ал кешке шараның ең басты бөлігі - подиумдық көрсетілімдер өтеді. Кешкі бағдарламада қатысушы дизайнерлердің жаңа коллекциялары көпшілік назарына ұсынылып, авторлық идеялар мен ұлттық және әлемдік сәннің тоғысқан үлгілері көрсетіледі.