Алматыда Mugalim кәсіпкерлер қауымдастығы педагогикалық жоғары оқу орындарының студенттеріне арналған заманауи жатақхана салып, оларды тегін баспанамен және қосымша біліммен қамтамасыз етуде, деп хабарлайды Shalqar.kz.

Аталмыш бастама елдегі білім беру сапасын арттыру мақсатында қолға алынған. Қауымдастық мүшелері орта мектептерге 5000 білікті мұғалім дайындауды көздеп отыр. Жатақхана тұрғындары үшін ағылшын тілі курстары мен Қазақстанның үздік ұстаздарымен бірлескен арнайы білім беру бағдарламалары ұсынылады.

Жаңадан салынған жатақхананы кәсіпкерлер өз қаражаттарына тұрғызған. Оқу орнына арналған ғимарат Алматының қақ ортасында орналасқан және студенттерге барлық жағдай жасалған.

«Біз бұл жерді жай ғана жатақхана емес, сапалы білім мен дамуға мүмкіндік беретін орталық ретінде жасадық. Мұнда бөлмелер, жуынатын орындар, асхана, кафе, демалыс бөлмелері – бәрі жоғары деңгейде», – дейді бастамашы кәсіпкерлердің бірі Жұмабек Жанықұлов.

Игі іске Қазақстанның әр аймағынан 50-ден астам бизнесмен-демеуші үлес қосқан. Қазіргі уақытта жатақханада 370 студент-педагог тұрады, ал оларды 300 үздік ерікті мұғалім оқытады.

Бұдан бөлек, кәсіпкерлердің бірі Urbo Coffee франшизасын тегін беріп, жатақхананың күнделікті шығындарын жабу мақсатында кафе жұмыс істеп тұр. Осы арқылы студенттердің білім алуына тұрақты қаржылық қолдау көрсетілуде.

Бұл бастаманы қолдаушылардың айтуынша, елдің болашағы білікті мұғалімдерге, дәрігерлерге және кәсіпкерлерге байланысты. Сондықтан дәл осы үш саланың студенттерін қолдауға ерекше мән беріліп отыр.

Mugalim қауымдастығы бұл бастаманы одан әрі кеңейтіп, білім беру саласына ұзақ мерзімді инвестиция салуды жоспарлап отыр.