Қазақстанда экологияны жақсарту мақсатында ауқымды шаралар қолға алынды. Биыл орман өрттерінің алдын алу, табиғи аймақтарды кеңейту, биоалуантүрлілікті сақтау және қайта өңдеу жүйесін жетілдіру бағытында бірқатар маңызды жобалар жүзеге аспақ, деп хабарлайды Shalqar.kz.

Ормандарды қорғау мен көбейту
 • Орман өрттерінің алдын алу үшін арнайы техника мен құрал-жабдықтар сатып алынады. Бұл мақсатқа 5,4 млрд теңге бөлінбек.
 • 2023 жылғы алапат өрттен зардап шеккен «Семей орманы» және тағы 23 орман шаруашылығы жан-жақты зерттеледі.
 • 6 өңірде жаңа орман тәлімбақтары салынып, 6 млн көшет өсіріледі. Әрбір тәлімбаққа 3,5 млрд теңге қарастырылған.

Қорықтар мен ұлттық парктер кеңейтіледі
 • «Мерке» өңірлік паркі, «Арал» және «Жайық орманы» резерваттары ашылады.
 • Үстірт, Қаратау, Іле-Балқаш қорықтары кеңейтіліп, оларға кіру автоматтандырылады. Енді келушілер үшін электронды төлем жүйесі енгізіледі.

Көгалдандыру және Аралды қайта жандандыру
 • Президент тапсырмасына сәйкес, 2 млрд ағаш отырғызу жобасы жүзеге асуда. Бүгінде 1,145 млрд ағаш егілген.
 • Арал теңізінің құрғаған табанына 1,1 млн гектар жерге сексеуіл отырғызылады. Бұл шөлейттенудің алдын алып, экожүйені қалпына келтіруге көмектеседі.

Қоқыс мәселесі мен қайта өңдеу
 • Тұрмыстық қатты қалдықтарды жинау мен қайта өңдеуге 238 млрд теңге бөлінді. Жаңа қалдық полигондары салынып, қоқысты бөлек жинау жүйесі дамытылады.

Жануарлар табиғатқа қайта оралады
 • Қазақстанда жолбарыс, құлан және Пржевальский жылқысы қайта жерсіндіріледі. Бұл – экожүйені қалпына келтіру жолындағы үлкен қадам.

Экология және табиғи ресурстар министрі Ерлан Нысанбаевтың айтуынша, бұл жобалар елдегі биоалуантүрлілікті сақтауға және табиғи байлықтарды болашақ ұрпаққа жеткізуге мүмкіндік береді.