Қазақстан мектептерінде тамақтану сапасына қойылатын талаптар қатаңдай түсті. Енді асханаларда тек санитарлық талапқа сай өнімдер ғана ұсынылады. Бұл туралы Shalqar.kz Оқу-ағарту министрлігінің ресми жауабына сүйене отырып хабарлайды.

Министрлік мәліметінше, жеткізушілерден міндетті түрде санитарлық-эпидемиологиялық қызметтің (СЭС) қорытындысы талап етіледі. Сонымен қатар, тегін тамақ алатын оқушылардың есебі толықтай цифрландырылды.

Мектеп асханаларына қатысты былтыр қолға алынған жүйелі шаралар қатарында:
 • Тамақтану нормаларын қайта қарау,
 • Асхана қызметкерлеріне қойылатын талаптарды күшейту,
 • Бракераждық комиссиялар арқылы күнделікті бақылау орнату бар.

Бракераж комиссияларының жұмысы міндеттеліп, оларға мектеп әкімшілігімен бірге ата-аналар, қоғамдық ұйым өкілдері және мәслихат депутаттары қатысады.

Ал жалпы мемлекеттік бақылауды Денсаулық сақтау министрлігіне қарасты Санитариялық-эпидемиологиялық бақылау комитетінің аумақтық бөлімшелері жүргізеді.

Айта кетейік, қазір еліміздегі білім беру ұйымдарына арналған жаңа тамақтану стандарты әзірленіп жатыр. Бұл – балалардың денсаулығы мен сапалы тағамға қолжетімділігін қамтамасыз етуге бағытталған маңызды қадам.