Астанада Қазақстан Президенті Қасым-Жомарт Тоқаев Израиль Кнессетінің төрағасы Амир Охананы қабылдады. Кездесуде тараптар екі ел арасындағы ынтымақтастықтың өзекті бағыттарын талқылады, деп хабарлайды Shalqar.kz.

Мемлекет басшысы Израиль Парламенті спикерінің сапарын қазақ-израиль қатынастарын нығайтуға деген ортақ ұмтылыстың белгісі ретінде бағалап, бұл сапардың екіжақты серіктестікті дамытудағы маңызын атап өтті.

Келіссөз барысында сауда-экономикалық байланыстарға және су ресурстарын тиімді басқару саласындағы ынтымақтастыққа ерекше назар аударылды. Президент Тоқаев Израильдің озық технологияларын жоғары бағалап, Қазақстан осы бағытта бірлесіп жұмыс істеуге дайын екенін жеткізді.

Амир Охана көрсетілген құрмет пен қонақжайлық үшін алғыс білдіріп, екі ел арасындағы көпжоспарлы қарым-қатынастың табысты дамып келе жатқанын айтты.