ەندى قازاقستاندىقتار تۋريستىك قىزمەتتى ساتىپ الاردا الاياقتاردىڭ ارباۋىنا تۇسىپ قالمايدى. ەلدە تۋروپەراتورلاردىڭ بىرىڭعاي تسيفرلىق تىزىلىمى ازىرلەنىپ جاتىر. بۇل جۇيە ارقىلى كەز كەلگەن ادام تۋركومپانييانىڭ زاڭدى جۇمىس ىستەيتىنىن تەكسەرە الادى, دەپ حابارلايدى Shalqar.kz.

ۇكىمەت وتىرىسىندا پرەمьەر-مينيستر ولجاس بەكتەنوۆ تۋريستىك سالانىڭ دامۋى مەن ونى تسيفرلاندىرۋ ماسەلەسىن كوتەردى. تسيفرلىق دامۋ, يننوۆاتسييالار جانە اەروعارىش ونەركاسىبى مينيسترى جاسلان ماديەۆتىڭ ايتۋىنشا, بۇگىندە 47 بيزنەس-پروتسەسكە رەينجينيرينگ جۇرگىزىلگەن. ناتيجەسىندە نەگىزگى كەمشىلىكتەر انىقتالعان: تسيفرلىق دەرەكتەردىڭ جوقتىعى, قولداۋدىڭ دۇرىس بولىنبەۋى, تىپتى كەيبىر زاڭسىز قىزمەت كورسەتۋشىلەردىڭ ارەكەتى ازاماتتارعا كەرى اسەرىن تيگىزۋدە.

وسى ماسەلەلەردى شەشۋ ۇشىن تۋريزم جانە سپورت مينيسترلىگى جاڭا تسيفرلىق پلاتفورمانى ازىرلەۋدە. بۇل جۇيە بارلىق پروتسەستى اۆتوماتتاندىرىپ, ادامي فاكتوردىڭ اسەرىن ازايتادى. ەڭ باستىسى — بىرىڭعاي تسيفرلىق تىزىلىم پايدا بولادى. ياعني, تۋريست ەندى كومپانييانىڭ ليتسەنزيياسى بار-جوعىن وڭاي انىقتاي الادى.

سونىمەن قاتار, تۋروپەراتورلارعا ليتسەنزييا بەرۋ پروتسەسى دە وزگەرۋدە. ولار ەكى باعىتتا ليتسەنزييا الادى: بىرىنشىسى – شەتەلگە ساياحات ۇيىمداستىرۋ (كوشپەلى تۋريزم), ەكىنشىسى – ەلگە كەلەتىن جانە ەل ىشىندەگى تۋريستەرگە قىزمەت كورسەتۋ. 2024 جىلى بۇل جۇيە ارقىلى 680 ليتسەنزييا بەرىلگەن, بارلىعى ەلەكتروندى تۇردە راسىمدەلدى.