الداعى ۋاقىتتا وقۋشىلار مەن كوللەدج ستۋدەنتتەرى بولاشاق ماماندىعىن ەرتەرەك انىقتاپ, ەڭبەك نارىعىنا بەيىمدەلۋدى تسيفرلىق فورماتتا ۇيرەنە الادى. قر ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, جاستارعا باعىتتالعان بىرقاتار جاڭا ونلاين پلاتفورمالار ىسكە قوسىلىپ جاتىر. بۇل باستامالاردىڭ باستى ماقساتى – جاس بۋىندى جۇمىسقا ورنالاسۋعا جۇيەلى تۇردە دايىنداۋ, دەپ حابارلايدى Shalqar.kz.

«مانساپ كومپاسى» پلاتفورماسى جىل سايىن 100 مىڭعا جۋىق وقۋشىنى قامتۋدى كوزدەيدى. جاڭا فۋنكتسييالاردىڭ ارقاسىندا 7–11-سىنىپ وقۋشىلارى كاسىبي دياگنوستيكادان وتىپ, بولاشاق ماماندىعىن دال انىقتاي الادى. پلاتفورمادا:
 • وزەكتى ماماندىقتار مەن بوس جۇمىس ورىندارى تۋرالى مالىمەتتەر بار;
 • كاسىبي دياگنوستيكادان وتىپ, مانساپتىق كەڭەس الۋعا بولادى;
 • جۇمىس بەرۋشىلەرمەن بايلانىس ورناتۋ مۇمكىندىگى قاراستىرىلعان.

بۇل جۇيە تۇلەكتەردىڭ جۇمىسقا ورنالاسۋ مۇمكىندىگىن ارتتىرۋعا باعىتتالعان.

500 مىڭ وقۋشى مەن كوللەدج ستۋدەنتتەرى ۇشىن ىسكە قوسىلعان «ەلەكتروندىق ەڭبەك بيرجاسى» بىرىڭعاي تسيفرلىق پلاتفورماسى ارقىلى جاستار جۇمىس ىزدەۋدى, ونلاين سۇحباتتاسۋ مەن ەڭبەك شارتىن جاساۋدى ۇيرەنەدى.

مينيسترلىك وكىلدەرى:
– مانساپ ورتالىقتارى ارقىلى پلاتفورمانى قولدانا وتىرىپ, جاستارعا جۇمىسقا ورنالاسۋ داعدىلارىن ۇيرەتۋ جوسپارلانۋدا. بۇل جاستاردىڭ ەڭبەككە ەرتە ارالاسۋىنا, وز قابىلەتىن دۇرىس باعىتتا دامىتۋىنا مۇمكىندىك بەرەدى, – دەيدى.

ۇش كەزەڭنەن تۇراتىن جۇيەلى وقىتۋ

جاستاردى ەڭبەك نارىعىنا دايىنداۋ ۇشىن كەلەسى ۇش قادامدىق جوسپار قولعا الىنعان:
 1. ەلەكتروندىق ەڭبەك بيرجاسىن پايدالانۋعا ارنالعان بەينەساباقتار, پرەزەنتاتسييالار مەن دارىستەر دايىنداۋ;
 2. وسى ماتەريالداردى Skills.enbek.kz پلاتفورماسىنا جۇكتەۋ;
 3. وقۋشىلار مەن ستۋدەنتتەردى جۇمىس ىزدەۋ مەن جۇمىسقا ورنالاسۋ داعدىلارىنا ۇيرەتۋ.

Skills.enbek.kz – العاشقى ەڭبەك مەكتەبى

بۇل پلاتفورمادا جاستار:
 • جۇمىس ىزدەۋدى;
 • كاسىبي رەزيۋمە تولتىرۋدى;
 • ونلاين سۇحباتتاسۋدان وتۋدى;
 • ەڭبەك شارتىن جاساۋدى ۇيرەنەدى.

جاڭا باستامالار – وقۋشىلار مەن ستۋدەنتتەرگە ەڭبەك نارىعىنا سەنىمدى قادام جاساۋعا مۇمكىندىك بەرەدى. ەندى ماماندىق تاڭداۋ كەزدەيسوق شەشىم ەمەس, سانالى تاڭداۋ بولماق.