الماتىدا بىرقاتار كۇردەلى وتالاردىڭ ناقتى قۇنى بەلگىلى بولدى. جۇرەككە قوسىمشا قولداۋ قۇرىلعىسىن ورناتۋ سيياقتى كەيبىر وپەراتسييالار 77,5 ميلليون تەڭگەگە دەيىن جەتەدى, دەپ حابارلايدى Shalqar.kz.

مەديتسينالىق ساقتاندىرۋ قورىنىڭ الماتى قالالىق فيليالىنىڭ ديرەكتورى ىليياس مۇحامەدجان مالىمدەگەندەي, 2024 جىلى قالادا تەك كارديوحيرۋرگييالىق وتالارعا 18,6 ميلليارد تەڭگە بولىنگەن. بۇل قاراجاتقا بارلىعى 6 805 وپەراتسييا جاسالىپ, ارقايسىسىنىڭ ورتاشا قۇنى 2,7 ميلليون تەڭگەنى قۇرادى.

سونىمەن قاتار:
 • 4521 نەيروحيرۋرگييالىق وتا – 8 ملرد تەڭگە,
 • 4593 بۋىن اۋىستىرۋ وتاسى – 7 ملرد تەڭگە,
 • 5045 قان تامىر جانە نەيرو-قانتامىر وتاسى – 6,7 ملرد تەڭگەگە قارجىلاندىرىلعان.

ال 107 ناۋقاسقا باۋىر مەن بۇيرەك سەكىلدى دونورلىق ورگاندار سالىنعان. بۇل ماقساتقا 709,7 ميلليون تەڭگە جۇمسالعان.

ەڭ قىمبات وتالار قاتارىنا مىنالار كىردى:
 • جۇرەككە قوسىمشا قۇرىلعى ورناتۋ – 77,5 ملن تەڭگە
 • جۇرەك قاقپاقشاسىن الماستىرۋ – 17 ملن تەڭگە
 • اللوگەندى دىڭ جاسۋشالارىن ترانسپلانتاتسييالاۋ – 16,9 ملن تەڭگە

ايتا كەتەيىك, بۇل كۇردەلى جانە شىعىندى وپەراتسييالاردىڭ بارلىعى مىندەتتى الەۋمەتتىك مەديتسينالىق ساقتاندىرۋ (مامس) اياسىندا قارجىلاندىرىلعان.