دجەننيفەر لوپەستىڭ استانادا وتەتىن كونتسەرتىنە بيلەتتەر ساناۋلى ساعات ىشىندە ساتىلىپ كەتتى. الەمدىك دەڭگەيدەگى جۇلدىزدىڭ شوۋىن وز كوزىمەن كورۋگە اسىققاندار كوپ بولدى. الايدا كونتسەرتكە بيلەت الا الماي قالعاندار ەندى الەۋمەتتىك جەلىلەر مەن ونلاين پلاتفورمالاردان “تيىمدى ۇسىنىستارعا” تاپ بولىپ جاتىر, دەپ حابارلايدى Shalqar.kz.

كونتسەرتكە رەسمي بيلەت باعاسى 40 مىڭنان 150 مىڭ تەڭگەگە دەيىن بولعان. دەسە دە, الىپساتارلار بۇل باعالاردى بىرنەشە ەسە كوتەرىپ, “VIP ورىندار” مەن “جەكە قولجەتىمدىلىكتى” ۋادە ەتىپ, پايدا تابۋعا تىرىسۋدا. بىراق مۇنداي ۇسىنىستارعا سەنۋدىڭ ارتى وكىنىشكە ۇلاسۋى مۇمكىن.

ۇيىمداستىرۋشىلار بىرنەشە رەت اتاپ وتكەندەي, قازىرگى تاڭدا ساتىلىمدا تەك ۆاۋچەرلەر عانا بار. ال ناقتى بيلەتتەر تەك 1 تامىز كۇنى, ياعني شاراعا بىرنەشە كۇن قالعاندا عانا قولجەتىمدى بولادى. بۇل – الىپساتارلىقتىڭ الدىن الۋ ۇشىن جاسالعان قادام.

بىر ادامعا تەك تورت بيلەتتەن ارتىق ساتىلمايدى. بەيتانىس ادامداردان نەمەسە كۇماندى اككاۋنتتاردان بيلەت ساتىپ الۋ – كونتسەرتكە مۇلدە كىرە الماي قالۋ قاۋپىن ارتتىرادى.