12 ساۋىر – ەلىمىزدە عىلىم قىزمەتكەرلەرى كۇنى. بۇل كۇن – قازاقستان عىلىمىنىڭ باستاۋىندا تۇرعان قانىش يمانتايۇلى ساتباەۆتىڭ تۋعان كۇنىمەن تۇسپا-تۇس كەلەتىن ەرەكشە داتا. بۇگىن بۇل مەرەكە تەك قۇتتىقتاۋلارمەن شەكتەلمەي, تەرەڭ ماعىنا مەن تاريحي ەستەلىكپەن استاسىپ وتتى, دەپ حابارلايدى Shalqar.kz.

عىلىم جانە جوعارى بىلىم مينيسترى ساياسات نۇربەك وز قۇتتىقتاۋىندا:
“عىلىم – ەل دامۋىنىڭ التىن دىڭگەگى. قازىرگى تاڭدا 208 عىلىمي جوبا جۇزەگە اسۋدا, ونىڭ 25-ى ەكسپورتقا شىقتى, ال 6 جوبا 1 ميلليارد تەڭگەدەن استام تابىسقا جەتتى. جالپى كوممەرتسييالانعان جوبالاردىڭ ەل ەكونوميكاسىنا قوسقان ۇلەسى – 118,4 ميلليارد تەڭگە,” – دەپ عىلىم سالاسىنداعى ناقتى جەتىستىكتەردى اتاپ وتتى.

بۇگىن ەلورداداعى عىلىم اكادەميياسىنىڭ اۋلاسىندا ەرەكشە شارا وتتى – “ساتباەۆ ساكۋراسى” قايتا وتىرعىزىلدى. Kanzan مەن Kiku-Shidare سورتىنداعى ەكى ساكۋرا قايتا گۇلدەپ, اكادەميكتىڭ ەسىمىن جاڭعىرتتى.

ساكۋرانىڭ تاريحى دا ەرەكشە. عيماراتتى سوعىس جىلدارىندا جاپون تۇتقىندارى تۇرعىزعان. سول كەزدە اكادەمييا باسشىسى قانىش ساتباەۆ ولارعا قامقورلىق كورسەتكەن. كەيىن جاپوندار قازاق عالىمىنا العىس رەتىندە ساكۋرا كوشەتتەرىن جىبەرىپ, سول اعاشتار اكادەمييا اۋلاسىنا وتىرعىزىلعان ەدى. بىراق ارادا 30 جىل وتكەندە, كەي شەنەۋنىكتەردىڭ عىلىمعا دەگەن نەمقۇرايلىلىعىنان ولار كەسىلىپ تاستالعان.

بيىل, عىلىم اكادەميياسىنىڭ باستاماسىمەن ساكۋرا قايتا وتىرعىزىلدى. بۇل – تەك اعاش وتىرعىزۋ ەمەس, وتكەنگە تاعزىم, عىلىمعا دەگەن قۇرمەت.