12 säuir – elimizde Ğılım qızmetkerleri küni. Bwl kün – Qazaqstan ğılımınıñ bastauında twrğan Qanış Imantaywlı Sätbaevtıñ tuğan künimen twspa-tws keletin erekşe data. Bügin bwl mereke tek qwttıqtaularmen şektelmey, tereñ mağına men tarihi estelikpen astasıp ötti, dep habarlaydı Shalqar.kz.

Ğılım jäne joğarı bilim ministri Sayasat Nwrbek öz qwttıqtauında:
“Ğılım – el damuınıñ altın diñgegi. Qazirgi tañda 208 ğılımi joba jüzege asuda, onıñ 25-i eksportqa şıqtı, al 6 joba 1 milliard teñgeden astam tabısqa jetti. Jalpı kommerciyalanğan jobalardıñ el ekonomikasına qosqan ülesi – 118,4 milliard teñge,” – dep ğılım salasındağı naqtı jetistikterdi atap ötti.

Bügin elordadağı Ğılım akademiyasınıñ aulasında erekşe şara ötti – “Sätbaev sakurası” qayta otırğızıldı. Kanzan men Kiku-Shidare sortındağı eki sakura qayta güldep, akademiktiñ esimin jañğırttı.

Sakuranıñ tarihı da erekşe. Ğimarattı soğıs jıldarında japon twtqındarı twrğızğan. Sol kezde akademiya basşısı Qanış Sätbaev olarğa qamqorlıq körsetken. Keyin japondar qazaq ğalımına alğıs retinde sakura köşetterin jiberip, sol ağaştar akademiya aulasına otırğızılğan edi. Biraq arada 30 jıl ötkende, key şeneunikterdiñ ğılımğa degen nemqwraylılığınan olar kesilip tastalğan.

Biıl, Ğılım akademiyasınıñ bastamasımen sakura qayta otırğızıldı. Bwl – tek ağaş otırğızu emes, ötkenge tağzım, ğılımğa degen qwrmet.