Моңғолияда қызылша індеті ушығып барады — ауру жұқтырғандардың саны 500-ден асты. Елдің Ұлттық жұқпалы ауруларды зерттеу орталығының дерегінше, соңғы тәулікте тағы 11 адамнан вирус анықталған, деп хабарлайды Shalqar.kz Синьхуа агенттігіне сілтеме жасап.

Анықталған жағдайлардың басым бөлігі мектеп жасындағы балалар арасында тіркелген. Мамандар олардың көпшілігі қызылшаға қарсы небәрі бір рет вакцина алғанын айтып отыр. Осыған байланысты дәрігерлер ата-аналарға балаларын екі компонентті екпемен уақытылы егуді ұсынады.

Медицина қызметкерлері қызылшаның жұқпалылығы өте жоғары екенін және тиісті ем жасалмаса, ауыр салдарға әкелуі мүмкін екенін ескертеді. Ауру белгілері – дене қызуының көтерілуі, жөтел, мұрыннан су ағу, тамақтың ауыруы мен көздің қабынуы.

Дәрігерлердің айтуынша, бұл дерттен қорғанудың ең тиімді жолы – вакцинация.