عارىشتى باعىندىرۋ — تەك NASA عالىمدارىنىڭ ەمەس, قازاقستاندىق مەكتەپ وقۋشىلارىنىڭ دا قولىنان كەلەدى! الماتىداعى نازارباەۆ زيياتكەرلىك مەكتەبىنىڭ ەكى كومانداسى اقش ۇلتتىق عارىش قوعامى مەن NASA ۇيىمداستىرعان حالىقارالىق Space Settlement Contest بايقاۋىندا جەڭىسكە جەتىپ, ەل مەرەيىن اسقاقتاتتى, دەپ حابارلايدى Shalqar.kz.

بۇل بايقاۋ جىل سايىن بۇكىل الەم وقۋشىلارىنىڭ اراسىندا وتكىزىلەدى. نەگىزگى ماقساتى — ينجەنەرلىك ويلاۋ مەن عىلىمي قييالدى دامىتۋ. بيىلعى دوداعا 25 ەلدەن 26 مىڭنان استام قاتىسۋشى تىركەلگەن.

9-سىنىپ وقۋشىلارى اناستاسييا تسوي, يۋلييا كيم, كاميلا ەرتىسقىزى جانە ىليياس داۋلەت ۇسىنعان YURT جوباسى بىرىنشى ورىندى جەڭىپ الدى. جاس عالىمدار يۋپيتەر وربيتاسىنداعى, ونىڭ گانيمەد پەن كالليستو سەرىكتەرىنە جاقىن ورنالاساتىن اۆتونومدى عارىش ستانتسيياسىن جوبالاپ, 30 مىڭ ادامعا ارنالعان بولاشاق مەكەندى ويلاپ تاپتى. ستانتسييا جاساندى گراۆيتاتسييامەن, ومىر سۇرۋگە قاجەت تولىق جۇيەمەن جابدىقتالعان.

ال 8-سىنىپ وقۋشىلارىنىڭ ەكىنشى كومانداسى — “يكارۋس” جوباسىمەن كۇمىس جۇلدەگە يە بولدى. ولار گانيمەدتىڭ تومەنگى وربيتاسىنا ورنالاسقان, 45 مىڭ ادامدى قابىلداي الاتىن زاماناۋي ستانتسييا جوباسىن قورعاپ شىققان. جوبانى جۇزەگە اسىرعان كوماندا قۇرامىندا: تابىلدى اسان, تەمىربۋلاتوۆ ارمان, ىنكاربەك سابىرجان, قۇزباكوۆا توميريس, جاپاروۆ مۇحيدين, الىشەر باعداۋلەت, بەرىك ۋالي, نۇرسۇلتان ايسۇلۋ, تايروۆ ارلان, باقىت اسلان. كوماندانىڭ جەتەكشىسى – 12-سىنىپ وقۋشىسى ادىلەت ساندىقباەۆ.