قازاقستاننىڭ ۇش ىرى قالاسى — استانا, الماتى جانە قاراعاندى — ۇلى وتان سوعىسى جىلدارىنداعى ەڭبەك ەرلىگى ۇشىن ەرەكشە مارتەبەگە يە بولماق. ولارعا «ەڭبەك داڭقى قالاسى. 1941–1945 جىلدار» قۇرمەتتى اتاعى بەرىلەدى, دەپ حابارلايدى Shalqar.kz.

بۇل شەشىم 11 ساۋىر كۇنى الماتىدا وتكەن تمد سىرتقى ىستەر مينيسترلەرى كەڭەسىنىڭ وتىرىسىندا قابىلداندى. جاڭا اتاق جەڭىستىڭ 80 جىلدىعىنا وراي بەرىلىپ وتىر.

سوعىس جىلدارى بۇل ۇش قالا اسكەري جانە ازاماتتىق ونىم وندىرىسىنىڭ ماڭىزدى ورتالىقتارىنا اينالعان. حالىق كۇن-تۇن دەمەي جۇمىس ىستەپ, مايدانعا قاجەتتىك اتاۋلىنى جىبەرىپ وتىرعان. بۇل — تىلداعى ەرلىكتىڭ سيمۆولى.

جاڭا اتاقپەن قاتار, ار قالادا ارنايى ستەلا ورناتىلادى. وندا قالانىڭ ەلتاڭباسى جانە «ەڭبەك داڭقى قالاسى» مارتەبەسى تۋرالى مالىمەت بەينەلەنەدى.

بۇل مارتەبەنى تەك قازاقستان قالالارى عانا المايدى.
ۇسىنىستى قازاقستان تاراپى كوتەرىپ, تمد-نىڭ گۋمانيتارلىق ىنتىماقتاستىق كەڭەسىنە ۇسىنعان. باستاما بىراۋىزدان قولداۋ تاپتى. الداعى ۋاقىتتا مۇنداي اتاقتى تمد قۇرامىنداعى وزگە دە قالالار الۋى مۇمكىن.