Қазақстанда алғаш рет жасанды интеллект (ЖИ) технологиясы арқылы қазақ тілінде анимациялық фильм жасалды. «Түркістан сақшылары» деп аталатын бұл ерекше жоба — Түркістан қаласының тұрғыны Ғасыр Құралбайұлының авторлық жұмысы, деп хабарлайды Shalqar.kz.

Ғасыр — «Turkistan» телеарнасының қызметкері әрі жасанды интеллектпен жұмыс істеуді меңгерген маман. Ол мультфильмнің алғашқы бөлімін бар болғаны 7 күн ішінде әзірлеп шыққан. Тағы бір таңғаларлық жайт — бір серияны жасауға небәрі 70 мың теңге кеткен.

— ЖИ бағдарламасының ақылы нұсқасына жазылу үшін 100 АҚШ доллары жұмсадым, ал саундтрек жаздыруға 20 мың теңге кетті, — дейді автор.

Мультфильм Түркістанды түрлі қауіптен қорғайтын мифологиялық кейіпкерлердің ерлік оқиғаларын баяндайды. Туындының мақсаты — балаларды адамгершілікке, патриоттыққа, мәдени құндылықтарға баулу. Персонаж аттары да нағыз ұлттық болмысқа сай:
Ақпантер — батыл да жылдам барыс,
Алтынқанат — қырағы бүркіт,
Тасбатыр ата — ғасыр жасаған дана тасбақа.

Қазір Ғасыр Құралбайұлы келесі бөлімдерді дайындап жатыр. Алдағы уақытта толықметражды, кинотеатрларға арналған коммерциялық мультфильм түсіруді де жоспарлап отыр.