Қазақ халқы үшін 15 сәуір – махаббаттың шынайы болмысын бейнелейтін ерекше күн. Бұл – Қозы Көрпеш пен Баян сұлуға арналған күн. Екеуінің хикаясы – тек ғашықтықтың символы ғана емес, ұлттың рухани коды, әдеби жауһары, деп хабарлайды Shalqar.kz.

Көпшілік бұл күнді «қазақтың Валентин күні» деп атайтыны бекер емес. Бірақ Қозы мен Баянның сезімі – жай романтика емес, ол – адалдық, сенім, тұрақтылық пен рухани беріктік.

Неліктен бұл күн маңызды?
Жаһандану заманы жастарды батыстық мерекелерге еліктетіп жатқанда, өзіміздің төл құндылықтарға бет бұру – рухани иммунитетті сақтаудың бір жолы. 15 сәуір – жастардың өз мәдениетіне, әдебиетіне деген құрметін арттыратын, ұлттық болмысын терең түсінуге жетелейтін күн.

Бұл күн кімдерге арналған?
Қозы мен Баян күні тек ғашықтарға емес. Бұл – ата-анаға, бауырға, достарға деген сүйіспеншілікті де білдіретін күн. Елге, жерге, тарихқа, тілге деген махаббатты да осы күнмен байланыстыруға болады.