قازاق حالقى ۇشىن 15 ساۋىر – ماحابباتتىڭ شىنايى بولمىسىن بەينەلەيتىن ەرەكشە كۇن. بۇل – قوزى كورپەش پەن بايان سۇلۋعا ارنالعان كۇن. ەكەۋىنىڭ حيكاياسى – تەك عاشىقتىقتىڭ سيمۆولى عانا ەمەس, ۇلتتىڭ رۋحاني كودى, ادەبي جاۋھارى, دەپ حابارلايدى Shalqar.kz.

كوپشىلىك بۇل كۇندى «قازاقتىڭ ۆالەنتين كۇنى» دەپ اتايتىنى بەكەر ەمەس. بىراق قوزى مەن باياننىڭ سەزىمى – جاي رومانتيكا ەمەس, ول – ادالدىق, سەنىم, تۇراقتىلىق پەن رۋحاني بەرىكتىك.

نەلىكتەن بۇل كۇن ماڭىزدى?
جاھاندانۋ زامانى جاستاردى باتىستىق مەرەكەلەرگە ەلىكتەتىپ جاتقاندا, وزىمىزدىڭ تول قۇندىلىقتارعا بەت بۇرۋ – رۋحاني يممۋنيتەتتى ساقتاۋدىڭ بىر جولى. 15 ساۋىر – جاستاردىڭ وز مادەنيەتىنە, ادەبيەتىنە دەگەن قۇرمەتىن ارتتىراتىن, ۇلتتىق بولمىسىن تەرەڭ تۇسىنۋگە جەتەلەيتىن كۇن.

بۇل كۇن كىمدەرگە ارنالعان?
قوزى مەن بايان كۇنى تەك عاشىقتارعا ەمەس. بۇل – اتا-اناعا, باۋىرعا, دوستارعا دەگەن سۇيىسپەنشىلىكتى دە بىلدىرەتىن كۇن. ەلگە, جەرگە, تاريحقا, تىلگە دەگەن ماحابباتتى دا وسى كۇنمەن بايلانىستىرۋعا بولادى.