Астанада өткен ІІ Орталық Азия медиа форумында өзбекстандық көрермендер енді қазақстандық телеарналарды да тамашалай алатыны белгілі болды. Бұл – екі ел арасындағы ақпараттық байланыстың жаңа кезеңі, деп хабарлайды Shalqar.kz.

Өзбекстан Президенті Әкімшілігі жанындағы Ақпарат және қоғамдық коммуникациялар агенттігінің директоры Асаджон Ходжаев елімізден бөлек, Түркия, Түрікменстан және Әзербайжан арналары да көрші елдің эфиріне енгізілгенін атап өтті.

– Біз бұл бағытта жұмысты әлі де жалғастырамыз. Орталық Азия елдері ұлттық арналарын өзара эфирлік кеңістікке енгізу тәжірибесін қолға алуымыз қажет. Бұл – мәдени-гуманитарлық байланысты күшейтіп, халықтар арасындағы түсіністікке көпір бола алады, – деді Ходжаев.

Оның айтуынша, Өзбекстан Қазақстанның ортақ ақпараттық алаң құру идеясын толықтай қолдайды. Аймақтағы мемлекеттерге ортақ, халықаралық Silk Way арнасының мүмкіндігін пайдалана отырып, бүкіл өңірге ортақ үнқататын медиа кеңістік қалыптастыру ұсынылды.

– Біз Silk Way арнасының халықаралық платформаға айналуына қарсы емеспіз, керісінше, ондағы жұмысты белсенді түрде қолдауға дайынбыз, – деді ол.

Бұл бастама қазақ тілі мен мәдениетінің көрші елдерде кеңінен танылуына тағы бір мүмкіндік бермек.