2025 جىلعى 1 ساۋىردەگى جاعداي بويىنشا ەلىمىزدە 83 مىڭنان استام سوعىس جانە تىل ارداگەرى تۇرىپ جاتىر. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى مالىمدەدى, دەپ حابارلايدى Shalqar.kz.

مينيسترلىك دەرەگىنشە, ولاردىڭ اراسىندا:
 • ۇلى وتان سوعىسىنا تىكەلەي قاتىسقان – 111 ارداگەر,
 • ۇوس ارداگەرلەرىنە تەڭەستىرىلگەن – 16 796 ادام,
 • باسقا مەملەكەتتەردەگى اسكەري قاقتىعىستارعا قاتىسقان – 26 553 ارداگەر,
 • تىل ەڭبەككەرلەرى – 39 588 ادام.

ارداگەرلەرگە 2025 جىلى جالپى سوماسى 17 ملرد تەڭگە كولەمىندە مەملەكەتتىك جاردەماقى قاراستىرىلعان. ارنايى جاردەماقى بارلىق ساناتتاعى ارداگەرلەرگە تولەنەدى جانە وزگە الەۋمەتتىك تولەمدەرگە قاراماستان بەرىلەدى.

2025 جىلعى اي سايىنعى تولەم مولشەرى مىناداي:
 • ۇوس ارداگەرلەرى – 16 اەك (62 912 تەڭگە);
 • جاراقات نەمەسە سوعىس سالدارىنان مۇگەدەك بولعاندارعا – 29 687 تەڭگە;
 • ۇوس-نا تەڭەستىرىلگەن باسقا قاتىسۋشىلارعا – 24 339 تەڭگە;
 • اۋعانستانداعى سوعىسقا قاتىسقاندارعا – 24 339 تەڭگە;
 • تاجىك-اۋعان شەكاراسىندا, يراك پەن قاراباقتاعى ميسسييالارعا قاتىسقاندارعا – 18 874 تەڭگە;
 • تىل ەڭبەككەرلەرىنە – 8 376 تەڭگە.

مەملەكەت ارداگەرلەرگە تەك قارجىلاي ەمەس, الەۋمەتتىك قولداۋ شارالارىن دا ۇسىنىپ كەلەدى.