Elordada Ortalıq Aziya jurnalistikasınıñ eñ auqımdı alañdarınıñ biri – İİ Ortalıq Aziya media forumı bastaldı. Şarağa 700-den astam delegat jinaldı. Olardıñ qatarında sayasatkerler, halıqaralıq wyım ökilderi, tanımal mediamamandar men aqparat qwraldarınıñ basşıları bar, dep habarlaydı Shalqar.kz.

Forumğa Qazaqstanmen qatar, Özbekstan, Qırğızstan, Täjikstan, Türikmenstan, Äzirbayjan, Qıtay, Resey, Katar jäne Wlıbritaniyadan kelgen sarapşılar qatısuda.

Maqsat – öñirlik media ıntımaqtastıqtı küşeytu, cifrlıq transformaciya üderisterin talqılau jäne aqparat qwraldarınıñ qoğamdağı rölin jaña qırınan qarastıru.

Eki künge josparlanğan jiında medianıñ jasandı intellekt däuirindegi ornı, äleumettik jelilerdiñ el imidjine ıqpalı, sonday-aq klimattıñ özgerui men geosayasi twraqsızdıq sekildi jahandıq sın-qaterler de nazardan tıs qalmaydı.

Sonday-aq forum ayasında Ortalıq Aziya elderiniñ aqparat salasındağı ökilderi bas qosıp, bolaşaqqa bağıttalğan naqtı wsınıstardı ortağa saladı.