استانادا وتكەن ىى ورتالىق ازييا مەديا فورۋمىندا وزبەكستاندىق كورەرمەندەر ەندى قازاقستاندىق تەلەارنالاردى دا تاماشالاي الاتىنى بەلگىلى بولدى. بۇل – ەكى ەل اراسىنداعى اقپاراتتىق بايلانىستىڭ جاڭا كەزەڭى, دەپ حابارلايدى Shalqar.kz.

وزبەكستان پرەزيدەنتى اكىمشىلىگى جانىنداعى اقپارات جانە قوعامدىق كوممۋنيكاتسييالار اگەنتتىگىنىڭ ديرەكتورى اسادجون حودجاەۆ ەلىمىزدەن بولەك, تۇركييا, تۇرىكمەنستان جانە ازەربايجان ارنالارى دا كورشى ەلدىڭ ەفيرىنە ەنگىزىلگەنىن اتاپ وتتى.

– بىز بۇل باعىتتا جۇمىستى الى دە جالعاستىرامىز. ورتالىق ازييا ەلدەرى ۇلتتىق ارنالارىن وزارا ەفيرلىك كەڭىستىككە ەنگىزۋ تاجىريبەسىن قولعا الۋىمىز قاجەت. بۇل – مادەني-گۋمانيتارلىق بايلانىستى كۇشەيتىپ, حالىقتار اراسىنداعى تۇسىنىستىككە كوپىر بولا الادى, – دەدى حودجاەۆ.

ونىڭ ايتۋىنشا, وزبەكستان قازاقستاننىڭ ورتاق اقپاراتتىق الاڭ قۇرۋ يدەياسىن تولىقتاي قولدايدى. ايماقتاعى مەملەكەتتەرگە ورتاق, حالىقارالىق Silk Way ارناسىنىڭ مۇمكىندىگىن پايدالانا وتىرىپ, بۇكىل وڭىرگە ورتاق ۇنقاتاتىن مەديا كەڭىستىك قالىپتاستىرۋ ۇسىنىلدى.

– بىز Silk Way ارناسىنىڭ حالىقارالىق پلاتفورماعا اينالۋىنا قارسى ەمەسپىز, كەرىسىنشە, ونداعى جۇمىستى بەلسەندى تۇردە قولداۋعا دايىنبىز, – دەدى ول.

بۇل باستاما قازاق تىلى مەن مادەنيەتىنىڭ كورشى ەلدەردە كەڭىنەن تانىلۋىنا تاعى بىر مۇمكىندىك بەرمەك.