23 сәуір – Қазақстанда алғаш рет Ұлттық кітап күні ретінде аталып өтті. Бұл күн – кітаптың қоғамдағы орнын қайта бағамдап, жастардың оқу мәдениетін қалыптастыруға арналған маңызды бастама, деп хабарлайды Shalqar.kz.

Мерекенің басты мақсаты – кітаптың құндылығын дәріптеу, өскелең ұрпақтың оқуға деген ынтасын арттыру және рухани бай, ой-өрісі кең ұлт қалыптастыру. Бұл күн – жай ғана дата емес, ұлттың зияткерлік әлеуетін көтеруге бағытталған нақты қадам.

Президент Қасым-Жомарт Тоқаев та бұл айтулы күнмен қазақстандықтарды құттықтап, кітапқа деген сүйіспеншіліктің маңызын атап өтті.

– Биыл алғаш рет аталып жатқан Ұлттық кітап күні құтты болсын! Бұл – білімпаздық, ізденімпаздық, кітапқұмарлық сияқты игі қасиеттерді дәріптейтін күн. Кітап оқыған ұрпақ озық ойлы болады. Сапалы ұлт осындай құндылықтар арқылы қалыптасады, – делінген Президенттің құттықтауында.

Ұлттық кітап күні – тек оқырмандар үшін емес, бүкіл қоғам үшін маңызды. Себебі кітап – мәңгілік құндылық. Ал сол құндылықты бағалай білетін ел – алға басатын ел.