23 ساۋىر – قازاقستاندا العاش رەت ۇلتتىق كىتاپ كۇنى رەتىندە اتالىپ وتتى. بۇل كۇن – كىتاپتىڭ قوعامداعى ورنىن قايتا باعامداپ, جاستاردىڭ وقۋ مادەنيەتىن قالىپتاستىرۋعا ارنالعان ماڭىزدى باستاما, دەپ حابارلايدى Shalqar.kz.

مەرەكەنىڭ باستى ماقساتى – كىتاپتىڭ قۇندىلىعىن دارىپتەۋ, وسكەلەڭ ۇرپاقتىڭ وقۋعا دەگەن ىنتاسىن ارتتىرۋ جانە رۋحاني باي, وي-ورىسى كەڭ ۇلت قالىپتاستىرۋ. بۇل كۇن – جاي عانا داتا ەمەس, ۇلتتىڭ زيياتكەرلىك الەۋەتىن كوتەرۋگە باعىتتالعان ناقتى قادام.

پرەزيدەنت قاسىم-جومارت توقاەۆ تا بۇل ايتۋلى كۇنمەن قازاقستاندىقتاردى قۇتتىقتاپ, كىتاپقا دەگەن سۇيىسپەنشىلىكتىڭ ماڭىزىن اتاپ وتتى.

– بيىل العاش رەت اتالىپ جاتقان ۇلتتىق كىتاپ كۇنى قۇتتى بولسىن! بۇل – بىلىمپازدىق, ىزدەنىمپازدىق, كىتاپقۇمارلىق سيياقتى يگى قاسيەتتەردى دارىپتەيتىن كۇن. كىتاپ وقىعان ۇرپاق وزىق ويلى بولادى. ساپالى ۇلت وسىنداي قۇندىلىقتار ارقىلى قالىپتاسادى, – دەلىنگەن پرەزيدەنتتىڭ قۇتتىقتاۋىندا.

ۇلتتىق كىتاپ كۇنى – تەك وقىرماندار ۇشىن ەمەس, بۇكىل قوعام ۇشىن ماڭىزدى. سەبەبى كىتاپ – ماڭگىلىك قۇندىلىق. ال سول قۇندىلىقتى باعالاي بىلەتىن ەل – العا باساتىن ەل.