2025 жылдың 27 сәуірінен бастап емделу үшін біржолғы зейнетақы төлемдерін (БЖТ) пайдалану ережелеріне бірқатар маңызды өзгерістер күшіне енеді. Бұл туралы “Отбасы банк” ресми түрде хабарлады. Енді қазақстандықтар БЖТ-ны тек өз денсаулығын түзетуге емес, сонымен бірге кәмелетке толмаған балаларының еміне де бағыттай алады, деп хабарлайды Shalqar.kz.

Стоматологиялық қызметтерге қатысты да жаңашылдықтар бар. Енді емдеуден өту үшін дәрігерлік комиссиядан емес, тіркелген емханадағы дәрігерлік-консультациялық комиссияның (ДКК) қорытындысын алу қажет болады.

Сонымен қатар, стоматология клиникасымен жасалатын шарт арнайы бекітілген формаға сай болуға тиіс. Міндетті түрде екі кезеңнен тұратын емдеу жоспары ұсынылады:
 • Бірінші кезең – хирургиялық ем (имплантация, сүйек салу, синус көтеру сияқты операциялар),
 • Екінші кезең – ортопедиялық ем (импланттардың үстіне құрылым орнату).

Әр кезеңде тістердің суреті түсіріліп, екі рет ДКК қорытындысы алынады. Бұл құжаттар enpf-otbasy.kz платформасына жүктелуі керек.

Егер имплантация қажет болмаса, алынбалы немесе алынбайтын протез орнату кезінде де төлем екі кезеңде жүргізіледі: протездеу басталар алдында және протез орнату алдында.

“Бұл өзгерістер зейнетақы жинақтарын пайдалану процесінің ашықтығын, қауіпсіздігін және әділдігін арттыру мақсатында енгізілді”, – деп атап өтті банк.