بۇگىن ەلىمىزدە تابيعاتتى جاڭعىرتۋعا ارنالعان ەرەكشە كۇن – بۇكىلقازاقستاندىق ورمان وتىرعىزۋ كۇنى وتۋدە. بۇل كۇنى ەلدىڭ تۇكپىر-تۇكپىرىندە اعاش وتىرعىزۋ, گۇلزارلار مەن ساياباقتاردى كوگالداندىرۋ جانە «تازا قازاقستان» اكتسيياسى اياسىندا اۋماقتاردى تازارتۋ شارالارى ۇيىمداستىرىلىپ جاتىر, دەپ حابارلايدى Shalqar.kz.

ەكولوگييا جانە تابيعي رەسۋرستار مينيسترلىگى دە قىزىلجار ورمان شارۋاشىلىعى اۋماعىندا كوشەت وتىرعىزۋ اكتسيياسىن وتكىزدى. ىس-شاراعا جالپى سانى 150 ادام قاتىسىپ, 2000 دانا جاس كوشەت جەرگە وتىرعىزىلدى.
ورمان جانە وسىمدىكتەر الەمىنىڭ وندىرۋ جانە پايدالانۋ باسقارماسىنىڭ باس ساراپشىسى باقداۋلەت امانگەلدينوۆتىڭ ايتۋىنشا, بۇگىنگى اكتسييانىڭ باستى ەرەكشەلىگى – تەك قوقىس جيناۋ ەمەس, جاڭا ومىر باستاۋى بولاتىن اعاشتاردى وتىرعىزۋ.

«بولاشاقتا مۇنداي ەكولوگييالىق باستامالار تۇراقتى تۇردە جالعاسىن تابادى. وڭىرلەردەگى اعاش وتىرعىزۋ جۇمىستارى اۋا رايىنا قاراي ارتۇرلى ۋاقىتتا باستالادى. ماسەلەن, وڭتۇستىك وڭىرلەردە كوكتەم ەرتە كەلەتىندىكتەن كوشەت وتىرعىزۋ جۇمىستارى ەرتە باستالدى», – دەيدى ساراپشى.

ايتا كەتەيىك, قازاقستان 2030 جىلعا دەيىن ورمان القابىن 13,7 ميلليون گەكتاردان 14,5 ميلليون گەكتارعا دەيىن ۇلعايتۋدى جوسپارلاپ وتىر. بۇل ماقساتقا جەتۋ ۇشىن 7 جىل ىشىندە شامامەن 1 ميلليون گەكتار جاڭا ورمان پايدا بولماق.

مەملەكەت باسشىسىنىڭ باستاماسىمەن مەملەكەتتىك ورمان قورى اۋماعىندا 2 ميلليارد اعاش وتىرعىزۋ تاپسىرماسى قويىلعان. 2021 جىلدان بەرى ەل كولەمىندە 736 مىڭ گەكتار جەرگە 1 ميلليارد 150 ميلليوننان استام اعاش وتىرعىزىلدى. بيىلدىڭ وزىندە 205 مىڭ گەكتارعا 306 ميلليون اعاش ەگىلگەن.