Оралда полицейлер өз өмірлерін қатерге тігіп, төртінші қабаттан секірмек болған әйелді құтқарып қалды, деп хабарлайды Shalqar.kz.

Түнгі уақытта Кердері көшесіндегі көпқабатты үй тұрғындары полицияға шұғыл хабарласқан. Оқиға орнына патрульдік полицияның бірнеше экипажы дереу жеткен.

Полиция капитаны Райымбек Газезов төменде қалып, әйелмен байланыс орнатып, оның ойын басқа жаққа бұруға тырысқан. Ал капитан Берік Сиязбаев, лейтенант Фархат Ғалиев және аға лейтенант Мирас Каримуллин үшінші қабат арқылы балконға көтеріліп, төртінші қабаттағы әйелді дәл уақытында ұстап үлгерді. Құтқарушылардың үйлесімді және кәсіби әрекеттерінің арқасында қайғылы жағдайдың алдын алынды.

Әйел қазір дәрігерлердің бақылауында. Полицейлердің батылдығы мен шапшаңдығы көпшіліктің алғысына бөленді.