Алматыда Жеңістің 80 жылдығына арналған іс-шаралар аясында Кеңсай зиратында тазарту және абаттандыру акциясы басталды, деп хабарлайды Shalqar.kz.

Кеңсай зираты – екінші дүниежүзілік соғыс ардагерлері мен еліміздің көрнекті тұлғалары жерленген қасиетті орын. Мұнда Кеңес Одағының екі мәрте Батыры Талғат Бигелдинов, Халық қаһарманы Рахымжан Қошқарбаев, Қазақстанның тұңғыш қорғаныс министрі Сағадат Нұрмағамбетов, сондай-ақ Кеңес Одағының Батыры әрі Халық қаһарманы Бауыржан Момышұлы сынды ұлы тұлғалар мәңгілік тыныс тапқан.

Игі шараға шығармашылық жоғары оқу орындарының студенттері мен еріктілер қатысты. Олар зират аумағын ретке келтіріп, тазалау жұмыстарын жүргізді және батырлардың рухына тағзым ретінде гүл шоқтарын қойды.

Ұйымдастырушылардың айтуынша, акцияның мақсаты – өткенге құрмет көрсету, майдангерлердің ерлігін ұлықтау және жастардың тарихи санасын қалыптастыру.