1 ماۋسىمنان باستاپ “ورال – ماڭعىستاۋ” باعىتى بويىنشا قاتىنايتىن پويىزدا ارنايى ايەلدەر ۆاگونى جۇمىس ىستەي باستادى. بۇل تۋرالى Shalqar.kz “جولاۋشىلار تاسىمالى” اق باسپاسوز قىزمەتىنە سىلتەمە جاساپ حابارلايدى.

جاڭا قىزمەتتىڭ ارقاسىندا ەلىمىزدە ايەلدەر ۆاگونى بار باعىتتاردىڭ سانى 12-گە جەتتى. مۇنداي ۆاگونداردا بيلەتتەر تەك ايەل جولاۋشىلارعا ساتىلادى, ال قىزمەت كورسەتۋدى ارنايى دايىندىقتان وتكەن ايەل جولسەرىكتەر اتقارادى. سونىمەن قاتار, جەتى جاسقا دەيىنگى ۇل بالالاردىڭ اناسى نەمەسە قامقورشىسىمەن بىرگە جۇرۋىنە رۇقسات ەتىلەدى.

ايەلدەر ۆاگونىنان ورىن العىڭىز كەلسە, ۆوكزال كاسساسىندا ارنايى سۇرانىس جاساۋىڭىز كەرەك نەمەسە bilet.railways.kz رەسمي سايتىنان ونلاين ساتىپ الا الاسىز. ونلاين برونداۋ كەزىندە “اۆ” بەلگىسىنە نازار اۋدارۋ قاجەت.

بيلەتتەر پويىزدىڭ قوزعالۋىنا 45 كۇن قالعاندا ساتىلىمعا شىعادى, بۇل ساپاردى الدىن الا جوسپارلاۋعا مۇمكىندىك بەرەدى.

بۇگىندە ايەلدەر ۆاگوندارى كەلەسى باعىتتاردا قاتىنايدى:
 • الماتى – ماڭعىستاۋ (№77/78, №351/352),
 • پاۆلودار – تۇركىستان (№45/46),
 • ماڭعىستاۋ – سەمەي (№37/38),
 • اتىراۋ – استانا (№47/48),
 • اقتوبە – الماتى (№33/34, №24/23),
 • استانا – الماتى (№4/3),
 • استانا – شىمكەنت (№71/72),
 • استانا – سەمەي (№354/353),
 • الماتى – شىمكەنت (№25/26),
 • ورال – ماڭعىستاۋ (№614/613).