قازاقستاندا دارىگەرلەر مەن مەدبيكەلەردىڭ قاۋىپسىزدىگىن كۇشەيتۋ ۇشىن جاڭا جۇيە ەنگىزىلەدى — ەندى مەديتسينا قىزمەتكەرلەرى ۆيدەوجەتون تاعىپ جۇرەتىن بولادى. بۇل تۋرالى دەنساۋلىق ساقتاۋ مينيسترى اقمارال النازاروۆا مالىمدەدى, دەپ حابارلايدى Shalqar.kz.

مينيستردىڭ سوزىنشە, ۆيدەوجەتوندار العاش بولىپ جەدەل جاردەم قىزمەتكەرلەرىنە بەرىلەدى. جوبا استانا مەن الماتىدا سىناقتان وتىپ ۇلگەرگەن. ەندى جىل سوڭىنا دەيىن وزگە قالالارعا دا تاراتىلادى. ال كەلەسى كەزەڭدە ەمحانالار مەن امبۋلاتورييا دارىگەرلەرى مەن مەدبيكەلەر دە بۇل قۇرىلعىلارمەن قامتىلادى.

“قازىر بۇل جۇيە بويىنشا بۇيرىق بەكىتىلدى. كەلەسى كەزەكتە ەمحانالىق بۋىن – دارىگەرلەر مەن مەدبيكەلەردىڭ قاۋىپسىزدىگى ۇشىن جەتونداردى ەنگىزۋدى قولعا الىپ جاتىرمىز”, – دەدى مينيستر ۇكىمەت وتىرىسىندا.

ۆيدەوجەتوندار مەديتسينا ۇيىمدارى مەن جەرگىلىكتى اكىمدىكتەر ەسەبىنەن ساتىپ الىنادى. جوبانى تولىق ىسكە اسىرۋ ۇشىن الدىمەن زاڭنامالىق وزگەرىستەر قاجەت. مينيسترلىك بۇل جۇمىسقا شامامەن ۇش اي ۋاقىت كەتەتىنىن ايتادى.

سونىمەن قاتار, دەنساۋلىق ساقتاۋ مينيسترلىگى قىزمەت بارىسىندا دارىگەرلەرگە قول كوتەرگەن ازاماتتاردى قىلمىستىق جاۋاپكەرشىلىككە تارتۋ جونىندە ۇسىنىس ەنگىزىپ وتىر.