قازاقستان جولدارىنىڭ ساپاسى ەندى تەك مەملەكەتتىك باقىلاۋمەن شەكتەلمەيدى. كولىك مينيسترلىگى مەن «قازاۆتوجول» ۇلتتىق كومپانيياسى رەسپۋبليكالىق ماڭىزى بار اۆتوجولداردى باقىلاۋدىڭ جاڭا فورماتىنا كوشتى — «حالىقتىق باقىلاۋ» جوباسى ىسكە قوسىلدى, دەپ حابارلايدى Shalqar.kz.

بۇل باستاما ەل ازاماتتارىن قوعامدىق باقىلاۋعا بەلسەندى ارالاسىپ, جول ينفراقۇرىلىمىنىڭ ساپاسىن بىرگە جاقسارتۋعا شاقىرادى. ەندى اربىر جۇرگىزۋشى مەن جولاۋشى كۇرەجولداعى كەمشىلىكتەردى كورسەتە الادى — اقاۋلار, شۇڭقىرلار, ساپاسىز جوندەۋ جۇمىستارى جايلى حابار بەرۋگە مۇمكىندىك بار.

جول ساپاسىنا ۇلەس قوسقىڭىز كەلە مە?
بارى وڭاي: 1403 قىسقا نومىرىنە حابارلاسىپ, وتىنىم قالدىرساڭىز جەتكىلىكتى. بايلانىس ورتالىعى سىزدەن اتى-جونىڭىزدى, تۇرعىلىقتى مەكەنىڭىز بەن بايلانىس نومىرىڭىزدى سۇرايدى.

قازىردىڭ وزىندە ەلىمىزدە 8800 شاقىرىم جولدا جوندەۋ جۇمىستارى جۇرىپ جاتىر:
 • 2100 شاقىرىمىندا — قۇرىلىس جانە قالپىنا كەلتىرۋ,
 • 460 شاقىرىمىندا — كۇردەلى جوندەۋ,
 • 6300 شاقىرىمىندا — ورتاشا جوندەۋ.

«حالىقتىق باقىلاۋ» شەڭبەرىندە جول قۇرىلىس نىساندارىنا تۇراقتى تۇردە شىعۋ جوسپارلانعان. قاي وڭىردە, قاي جول تەكسەرىلەتىنى تۋرالى تولىق اقپارات www.qaj.kz سايتىندا جارييالانادى.

بۇل جۇيە ارقىلى حالىق پەن بيلىك اراسىندا سەنىم ارتىپ, جول قۇرىلىسى سالاسىنداعى اشىقتىق پەن جاۋاپكەرشىلىك جاڭا دەڭگەيگە كوتەرىلەدى.