سوڭعى جىلدارى قازاقستاندا بىلىم بەرۋ سالاسىنا ەرەكشە كوڭىل بولىنىپ وتىر. مەملەكەت تەك مەكتەپ سانىن كوبەيتىپ قانا قويماي, ۇستازداردىڭ الەۋمەتتىك جاعدايىن جاقسارتۋعا, كاسىبي بىلىكتىلىگىن ارتتىرۋعا باعىتتالعان ماڭىزدى رەفورمالار جۇرگىزىپ كەلەدى, دەپ حابارلايدى Shalqar.kz.

2024-2025 وقۋ جىلىندا ەلىمىزدە 8 مىڭعا جۋىق مەكتەپ جۇمىس ىستەيدى. وندا 3,9 ميلليوننان استام وقۋشى بىلىم الۋدا, ونىڭ 352 مىڭى – العاش مەكتەپ تابالدىرىعىن اتتاعان بۇلدىرشىندەر.

بيىل مەكتەپتەردە 406 مىڭنان استام مۇعالىم ەڭبەك ەتۋدە — بۇل وتكەن جىلمەن سالىستىرعاندا 8 مىڭعا كوپ. 2020 جىلدان بەرى جۇزەگە اسىرىلىپ جاتقان «پەداگوگ مارتەبەسى» ساياساتى اياسىندا مۇعالىمدەردىڭ جالاقىسى ەكى ەسەگە ارتتى. بۇعان قوسا, پەداگوگتەردىڭ ەڭبەك وتىلى, بىلىكتىلىك ساناتى مەن تالىمگەرلىگى ۇشىن قوسىمشا ۇستەمەاقىلار تولەنىپ كەلەدى. اۋىل مۇعالىمدەرى قالالىق ارىپتەستەرىنەن كەمىندە 25%-عا ارتىق جالاقى الادى.

2025 جىلى 11 مىڭنان استام مۇعالىم بىلىكتىلىگىن ارتتىرۋ كۋرسىنان وتسە, ولاردىڭ جارتىسىنان كوبى اۋىلدىق مەكتەپتەردە ەڭبەك ەتەتىن ۇستازدار. جاڭا جىلدان باستاپ پەداگوگتەردىڭ كاسىبي دامۋىن قامتاماسىز ەتەتىن «ۇستاز» ۇلتتىق پلاتفورماسى ىسكە قوسىلىپ, 150 مىڭ مۇعالىمدى اتتەستاتتاۋدان وتكىزۋ جوسپارلانعان.

بىلىم بەرۋدەگى باستى باسىمدىقتاردىڭ بىرى — تسيفرلاندىرۋ. بۇگىندە 1757 مەكتەپتە STARLINK سپۋتنيكتىك ينتەرنەتى ورناتىلعان. بارلىق وقۋلىقتار تسيفرلىق فورماتقا كوشىرىلىپ, 11 ونلاين پلاتفورمادا قولجەتىمدى.

سونىمەن قاتار, ەلىمىز ببجم (بىلىم بەرۋ جۇيەسىنىڭ مونيتورينگى) اتتى ۇلتتىق باعالاۋ جۇيەسى ارقىلى حالىقارالىق ستاندارتتارعا ساي بىلىم ساپاسىن تەكسەرىپ وتىرعان جالعىز ورتا ازييا مەملەكەتى سانالادى. بۇل جۇيە وقۋ باعدارلاماسىنىڭ تيىمدىلىگىن باعالاۋعا جانە بىلىم بەرۋ پروتسەسىن جەتىلدىرۋگە مۇمكىندىك بەرەدى.

مەملەكەت ۇستازدىق ماماندىقتىڭ بەدەلىن ارتتىرۋ ارقىلى بولاشاق پەداگوگتەردى ىنتالاندىرۋدا. قازىردىڭ وزىندە مەكتەپ بىتىرۋشىلەر پەداگوگيكاعا كوبىرەك بەت بۇرىپ وتىر. بۇل بىلىم سالاسىنداعى جاڭعىرۋدىڭ ناقتى ناتيجەسى.