Қазақстан аспанында жаңа бренд! Бұған дейін отандық Qazaq Air атауымен танымал болған әуе компания енді VietJet Kazakhstan деп аталады. Бұл жаңалық Қазақстан мен Вьетнам арасындағы іскерлік байланыстардың жаңа кезеңін бастайтынын көрсетеді, деп хабарлайды Shalqar.kz.

VietJet Air-дың Qazaq Air-ды сатып алатыны туралы 2023 жылы белгілі болған еді. Ал биыл “Самұрық-Қазына” АҚ басқарма төрағасы Нұрлан Жақыпов мәміленің сәтті аяқталғанын ресми түрде жариялады. Компанияны вьетнамдық ірі SOVICO Group иеленді.

“Барлық шарттар толық орындалды, төлем жасалды, акциялар инвесторға берілді. Бұл серіктестік тек әуе тасымалын емес, сонымен қатар Қазақстан мен Вьетнам арасындағы экономикалық қарым-қатынасты жаңа деңгейге шығарады”, – деді Жақыпов елордада өткен бизнес-форумда.

VietJet Kazakhstan брендімен енді елімізде жаңа бағыттар ашылып, аймақтық маршруттар кеңеймек. Бұл – тек туризм ғана емес, экономикалық даму мен өңірлердің байланысын күшейтетін маңызды қадам.