Бұрын әскери оқу орнын тастап кеткендер енді білім жолын қайта жалғастыра алады – бар болғаны eGov.kz порталына кірсе жеткілікті. Бұл жаңалық әсіресе бір кездері әскери қызметті таңдаған, бірақ түрлі себеппен оқудан шыққандар үшін үлкен мүмкіндік, деп хабарлайды Shalqar.kz Электронды үкіметтің ресми сайтына сілтеме жасап.


Жаңа цифрлық қызмет арқылы бұрынғы курсанттар әскери жоғары оқу орнына қайта қабылдану үшін өтінімді онлайн түрде жолдай алады. Бұған дейін мұндай мүмкіндік тек қағаз жүзінде, ұзақ әрі күрделі рәсімдермен жүзеге асатын. Енді бәрі әлдеқайда жеңіл: жүйе қажетті құжаттардың көбін автоматты түрде жинап береді.

Қызмет кімдерге қолжетімді?
Бұл мүмкіндік кемінде бір семестр оқыған, бірақ оқудан шығарылғаннан кейін бір жылдан аспаған курсанттарға арналған. Уақыты өтіп кетсе, қалпына келу мүмкіндігі болмайды.

Өтініш беру қадамдары:
 1. eGov.kz порталына тіркелу;
 2. “Әскери қызмет” бөліміне өту;
 3. “Әскери оқу орындарына қалпына келтіру” қызметін таңдау;
 4. Оқу орны мен оқудан шығарылған уақытты көрсету;
 5. Қажетті деректерді толтырып, электронды қол қою.

Өтінішті қарау мерзімі — 20 жұмыс күні. Егер шешім оң болса, хабарлама eGov.kz-тегі жеке кабинетке келеді. Қалпына келу мүмкін болмаса, себеп көрсетілген бас тарту хаты жолданады.

Бұл қызметті Қорғаныс министрлігі, Цифрлық даму министрлігі және Ұлттық ақпараттық технологиялар АҚ бірлесе іске асырған.