بۇرىن اسكەري وقۋ ورنىن تاستاپ كەتكەندەر ەندى بىلىم جولىن قايتا جالعاستىرا الادى – بار بولعانى eGov.kz پورتالىنا كىرسە جەتكىلىكتى. بۇل جاڭالىق اسىرەسە بىر كەزدەرى اسكەري قىزمەتتى تاڭداعان, بىراق تۇرلى سەبەپپەن وقۋدان شىققاندار ۇشىن ۇلكەن مۇمكىندىك, دەپ حابارلايدى Shalqar.kz ەلەكتروندى ۇكىمەتتىڭ رەسمي سايتىنا سىلتەمە جاساپ.


جاڭا تسيفرلىق قىزمەت ارقىلى بۇرىنعى كۋرسانتتار اسكەري جوعارى وقۋ ورنىنا قايتا قابىلدانۋ ۇشىن وتىنىمدى ونلاين تۇردە جولداي الادى. بۇعان دەيىن مۇنداي مۇمكىندىك تەك قاعاز جۇزىندە, ۇزاق ارى كۇردەلى راسىمدەرمەن جۇزەگە اساتىن. ەندى بارى الدەقايدا جەڭىل: جۇيە قاجەتتى قۇجاتتاردىڭ كوبىن اۆتوماتتى تۇردە جيناپ بەرەدى.

قىزمەت كىمدەرگە قولجەتىمدى?
بۇل مۇمكىندىك كەمىندە بىر سەمەستر وقىعان, بىراق وقۋدان شىعارىلعاننان كەيىن بىر جىلدان اسپاعان كۋرسانتتارعا ارنالعان. ۋاقىتى وتىپ كەتسە, قالپىنا كەلۋ مۇمكىندىگى بولمايدى.

وتىنىش بەرۋ قادامدارى:
 1. eGov.kz پورتالىنا تىركەلۋ;
 2. “اسكەري قىزمەت” بولىمىنە وتۋ;
 3. “اسكەري وقۋ ورىندارىنا قالپىنا كەلتىرۋ” قىزمەتىن تاڭداۋ;
 4. وقۋ ورنى مەن وقۋدان شىعارىلعان ۋاقىتتى كورسەتۋ;
 5. قاجەتتى دەرەكتەردى تولتىرىپ, ەلەكتروندى قول قويۋ.

وتىنىشتى قاراۋ مەرزىمى — 20 جۇمىس كۇنى. ەگەر شەشىم وڭ بولسا, حابارلاما eGov.kz-تەگى جەكە كابينەتكە كەلەدى. قالپىنا كەلۋ مۇمكىن بولماسا, سەبەپ كورسەتىلگەن باس تارتۋ حاتى جولدانادى.

بۇل قىزمەتتى قورعانىس مينيسترلىگى, تسيفرلىق دامۋ مينيسترلىگى جانە ۇلتتىق اقپاراتتىق تەحنولوگييالار اق بىرلەسە ىسكە اسىرعان.