Қазақстанның оңтүстік өңірлерінде көктемгі егіс науқаны аяқталуға жақын. Ауыл шаруашылығы министрлігінің мәліметінше, бүгінде ел аумағында 2,1 миллион гектардан астам жерге егін егілді, деп хабарлайды Shalqar.kz.

Егіс науқаны агротехникалық талаптарға сай қарқынды жүріп жатыр. Әсіресе, Түркістан, Жамбыл, Жетісу және Алматы облыстарында жұмыс белсенді жүргізілуде. Түркістан облысында – 449,2 мың гектар, Жамбылда – 306 мың, Жетісуда – 292,6 мың, Алматы облысында – 187,9 мың гектар алқапқа дән себілген.

Сол сияқты егіс науқаны еліміздің басқа аймақтарында да қызу жүріп жатыр: Шығыс Қазақстанда – 156,3 мың га, Абай облысында – 138,8 мың га, Қостанайда – 85 мың га, Ақмолада – 74,8 мың га, Қызылордада – 52,5 мың га, Павлодарда – 56,9 мың га және т.б.

Шаруалар дала жұмыстарын бастамас бұрын, 16,7 млн гектар жердің ылғалы жабылды, 6,1 млн гектар жерге дейін себуге дайындық жасалды, ал 1,7 млн гектар жер жыртылды.

Бүгінде егілген дақылдардың нақты көлемі де белгілі:
 • Дәнді дақылдар – 942,1 мың га
 • Мал азығы – 242,8 мың га
 • Майлы дақылдар – 492 мың га
 • Мақта – 118,8 мың га
 • Көкөністер – 71,8 мың га
 • Бақша өнімдері – 57,7 мың га
 • Картоп – 32,5 мың га
 • Қант қызылшасы – 15,6 мың га
 • Күріш – 26,3 мың га

Шаруаларды қолдауға бағытталған бірқатар шаралар қабылданды. Атап айтқанда, арзандатылған дизель отыны 254 теңге/литр бағамен бөлінді (нарықтық бағадан 15% төмен). Сонымен қатар 866,8 мың тонна минералды тыңайтқыш жеткізуге шарт жасалған.

Ауыл шаруашылығы министрлігінің мәліметінше, тұқым қажеттілігі толық қамтамасыз етілген – 2,3 млн тонна. Оның 99%-ы зертханалық тексерістен өтіп, кондициялық деп танылды.

Министрлік егіс барысына мониторинг жүргізуді жалғастырып, әдістемелік және ұйымдастырушылық қолдау көрсетіп отыр.