استانادا جەڭىستىڭ 80 جىلدىعىنا ارنالعان اسكەري پاراد وتتى. ايرىقشا شارادا سوز سويلەگەن پرەزيدەنت قاسىم-جومارت توقاەۆ بۇل كۇننىڭ تەك تاريحي عانا ەمەس, رۋحاني مانىنىڭ زور ەكەنىن اتاپ وتتى, دەپ حابارلايدى Shalqar.kz اقورداعا سىلتەمە جاساپ.

"بيىل ۇلى جەڭىسكە – 80 جىل! بارشاڭىزعا ۇلى جەڭىس كۇنى قۇتتى بولسىن! بۇل مەيرام – حالقىمىزدىڭ جاۋىنگەرلىك رۋحىنىڭ سيمۆولى. بىز ەلدىك ۇشىن كۇرەسكەن باتىر بابالاردى ۇلىقتايمىز. وتان قورعاۋ جولىندا وپات بولعان بوزداقتارعا تاعزىم ەتەمىز. بەيبىت كۇندى قىراعى كۇزەتىپ تۇرعان ساربازدارعا قۇرمەت كورسەتەمىز”, - دەدى مەملەكەت باسشىسى.

پرەزيدەنت مالىمەتىنشە, سوعىس جىلدارى مايدانعا 1 ميلليون 200 مىڭنان استام قازاقستاندىق اتتانىپ, ولاردىڭ جارتىسى وتان ۇشىن جانىن قيدى. كەڭەس وداعىنىڭ باتىرى اتانعان 500-دەن استام جاۋىنگەردىڭ ەسىمى تاريحتا التىن ارىپپەن جازىلدى. باتىرلار قاتارىندا باۋىرجان مومىشۇلى, مانشۇك مامەتوۆا, الييا مولداعۇلوۆا, راقىمجان قوشقارباەۆ جانە باسقا دا قاھارماندار بار.

سونىمەن قاتار, تىلداعى ەڭبەككەرلەردىڭ ەرلىگىن دە ەرەكشە اتاپ وتتى. قازاقستاننان مايدانعا مىڭداعان ۆاگون ازىق-تۇلىك پەن كيىم-كەشەك جونەلتىلدى. قىسقا ۋاقىت ىشىندە جاڭا وندىرىستەر ىسكە قوسىلىپ, سوعىسقا قاجەتتى وق-دارى مەن قارۋ-جاراق دايىندالدى. ون وقتىڭ توعىزى قازاق جەرىندە جاسالعانى – سونىڭ ايعاعى.

مەملەكەت باسشىسى سوز سوڭىندا بۇكىل ەلدى جەڭىستىڭ 80 جىلدىعىمەن قۇتتىقتاپ, جارقىن بولاشاق ۇشىن جۇمىلا ەڭبەك ەتۋگە شاقىردى.