مەملەكەت باسشىسى قاسىم-جومارت توقاەۆ قازاقستاندىقتاردى جەڭىس كۇنىمەن قۇتتىقتادى, دەپ حابارلايدى Shalqar.kz اقورداعا سىلتەمە جاساپ.

“قۇرمەتتى وتانداستار!

سىزدەردى ۇلى جەڭىستىڭ 80 جىلدىعىمەن شىن جۇرەكتەن قۇتتىقتايمىن!

وسى مەرەيلى كۇندى ەلىمىزدىڭ اربىر ازاماتى ەرەكشە كوڭىل-كۇيمەن قارسى الىپ, جەڭىمپاز اعا بۋىنعا شەكسىز ريزاشىلىعىن بىلدىرەدى.

فاشيزمگە قارسى سۇراپىل سوعىس حالقىمىزعا وراسان زور قايعى-قاسىرەت اكەلدى. بىزدىڭ قاھارمان جاۋىنگەرلەرىمىز اسقان ەرلىك پەن باتىلدىق تانىتىپ, ازاتتىق پەن ادىلدىك جولىندا ايانباي كۇرەستى. جۇز مىڭداعان ساربازىمىز ۇرىس دالاسىندا قازا تاپتى. تىلداعى جۇرت تا ادام ايتقىسىز قيىندىققا قاراماستان تىنىمسىز تەر توگىپ, جەڭىستى جاقىنداتۋعا ولشەۋسىز ۇلەس قوستى. ولار ەگىس القابىندا, زاۋىتتار مەن فابريكالاردا كۇن-تۇن دەمەي جۇمىس ىستەپ, مايداندى قامتاماسىز ەتتى.

بىز وتانداستارىمىزدىڭ قايتپاس قايسارلىعى مەن قاجىرلى ەڭبەگىن ەشقاشان ۇمىتپايمىز. جانقييارلىق پەن ەرلىكتىڭ وزىق ۇلگىسىن كورسەتكەن باتىرلارىمىزدىڭ ەسىمىن اردايىم ۇلىقتايمىز. ارداگەرلەرىمىزگە قامقورلىق جاساپ, قولداۋ بىلدىرەمىز”, - دەلىنگەن پرەزيدەنت قۇتتىقتاۋىندا.

بۇگىنگى بەيبىت ومىر – كەشەگى ەرلىككە تاعزىم. ۇلى جەڭىس كۇنى قۇتتى بولسىن!