قازاق ادەبيەتى ورنى تولماس قازاعا ۇشىرادى. كورنەكتى اقىن, قازاقستاننىڭ حالىق جازۋشىسى, مەملەكەتتىك سىيلىقتىڭ لاۋرەاتى تەمىرحان مەدەتبەك 81 جاسقا قاراعان شاعىندا دۇنيەدەن وزدى, دەپ حابارلايدى Shalqar.kz.

قارالى حاباردى اقىن قاسىمحان بەگمانوۆ Facebook پاراقشاسىندا جارييالاپ, سوڭعى ساتتەردە جانىندا بولعان ساتتەرىمەن بولىستى. اقىننىڭ اۋىر حالدە اۋرۋحانادا جاتقانى بۇعان دەيىن بەلگىلى بولعان ەدى. سوڭعى كۇندەرى قازاقستان جازۋشىلار وداعىنىڭ باسشىلىعى مەن جاقىن ارىپتەستەرى ونىڭ حالىنەن تۇراقتى حابار الىپ وتىرعان.

— قازاق پوەزيياسىنا قۇبىلىس بولىپ كەلگەن, اسقاق رۋحتىڭ يەسى تەمىرحان اعامىزبەن كەشە ۇنسىز قوشتاستىق, — دەدى قاسىمحان بەگمانوۆ.

تەمىرحان مەدەتبەك — تاۋەلسىزدىك داۋىرىندەگى قازاق پوەزيياسىنا جاڭاشا لەپ, ۇلتتىق رۋح اكەلگەن ەرەكشە تۇلعا. ونىڭ شىعارماشىلىعى ۇلت بولمىسى مەن تاريحىنا تەرەڭ بويلاي وتىرىپ, زامانا ۇنىن پوەزييا تىلىمەن جەتكىزە بىلدى.

جۋىردا عانا الماتىدا 80 جىلدىق مەرەيتويى اتالىپ وتىپ, رۋحاني ورتا ونى ەرەكشە ىلتيپاتپەن قارسى العان ەدى.

اقىننىڭ جانازاسى مەن اس بەرۋ راسىمى تۋرالى قوسىمشا اقپارات جاقىن كۇندەرى حابارلانادى.