قازاقستاندا سوزىلمالى اۋرۋى بار ازاماتتارعا دارىگەردىڭ قابىلداۋىنا بارماي-اق, رەتسەپت الۋ مۇمكىندىگى قاراستىرىلىپ جاتىر. بۇل تۋرالى پرەمьەر-مينيستردىڭ ورىنباسارى ەرمەك كوشەرباەۆ مالىمدەدى, دەپ حابارلايدى Shalqar.kz.

ونىڭ ايتۋىنشا, 2023 جىلدىڭ شىلدەسىنەن بەرى ديسپانسەرلىك ەسەپتە تۇرعان پاتسيەنتتەرگە ۇش ايعا دەيىنگى مەرزىمگە دارى-دارمەككە رەتسەپت جازۋ مۇمكىندىگى بەرىلگەن. رەتسەپتتەر ەمحانالاردا QR-كود, SMS-كود نەمەسە قاعاز تۇرىندە راسىمدەلەدى. قازىر بۇل جۇيە “الەۋمەتتىك امييان” جوباسى اياسىندا 744 مەديتسينالىق ۇيىمدى قامتىپ وتىر.

ەرمەك كوشەرباەۆتىڭ سوزىنشە, الداعى ۋاقىتتا ورتا مەديتسينالىق قىزمەتكەرلەر — ياعني, مەدبيكەلەر دارىگەردىڭ تاعايىنداۋى بولعان جاعدايدا وزدەرى رەتسەپت جازا الادى. بۇل اسىرەسە سوزىلمالى اۋرۋمەن ومىر سۇرەتىن ازاماتتار ۇشىن وتە تيىمدى. سەبەبى ولار رەتسەپت الۋ ۇشىن دارىگەرگە كەزەككە تۇرماي-اق, ەمحانالاردا مەدبيكەگە جۇگىنىپ, قاجەتتى دارىلەرىن الا الادى.

سونىمەن قاتار, دەنساۋلىق ساقتاۋ مينيسترلىگى ساتىپ الىناتىن دارىلىك زاتتار تىزىمىن قايتا قاراپ جاتىر. قولدانىستان شىققان دارىلەر الىنىپ تاستالىپ, ولاردىڭ ورنىنا جاڭا يننوۆاتسييالىق پرەپاراتتار قوسىلعان. قازىر بۇل وزگەرىستەر مەملەكەتتىك ورگانداردا كەلىسۋ كەزەڭىندە.

جاڭارتىلعان تىزىمدە 19 جاڭا دارى بار, ال 172 دارىلىك زات پەن مەديتسينالىق بۇيىم الىپ تاستالعان. سونداي-اق, 2025 جىلدىڭ ساۋىرىنەن باستاپ ولىم-جىتىم مەن ومىر سۇرۋ ۇزاقتىعىنا اسەر ەتپەيتىن 32 اۋرۋ تۇرى امبۋلاتورييالىق قامتاماسىز ەتۋ تىزىمىنەن شىعارىلعان.

بۇدان بولەك, 12 الەۋمەتتىك ماڭىزى بار اۋرۋ تمككك (تەگىن مەديتسينالىق كومەك) پاكەتىنىڭ ورنىنا مامس (مىندەتتى الەۋمەتتىك مەديتسينالىق ساقتاندىرۋ) جۇيەسىنە اۋىستىرىلادى.