Қазақстанның бірқатар өңірінде мамыр айында құрғақшылық болуы ықтимал. Бұл туралы Экология және табиғи ресурстар министрі Ерлан Нысанбаев мәлімдеді, деп хабарлайды Shalqar.kz.

Министрдің айтуынша, еліміздің басым бөлігінде ауа райы ыстық әрі жауын-шашын аз болады. Тек кейбір тау бөктерлерінде, оңтүстік өңірлерде және астықты аймақтарда ғана жауын-шашын мөлшері климаттық нормаға жуық болуы мүмкін.

Қай өңірлерде құрғақшылық болады?

Алдын ала болжамға сәйкес, мамыр айында құрғақшылық қаупі мына өңірлерде күтіледі:
 • Қостанай облысының оңтүстігі
 • Батыс Қазақстан мен Маңғыстау облыстарының оңтүстік-батысы
 • Қызылорда облысының солтүстік-батысы
 • Алматы мен Жамбыл облыстарының солтүстігі
 • Қарағанды облысының оңтүстігі
 • Ақтөбе, Атырау, Абай және Түркістан облыстарының жекелеген аудандары

Министр астық егетін аймақтарда егін егу жұмыстарын мүмкіндігінше ертерек бастауға кеңес берді.