قوستانايدا Jetour X70 Plus كولىگىن CKD ادىسىمەن قۇراستىرۋ وندىرىسى رەسمي تۇردە باستالدى. وندىرىس ورنىنا بارعان ونەركاسىپ جانە قۇرىلىس مينيسترى ەرسايىن ناعاسپاەۆ جاڭا جەلىنىڭ جۇمىسىن ىسكە قوستى, دەپ حابارلايدى Shalqar.kz.

CKD — كولىكتى شاناقتان باستاپ سىرلاۋ مەن تولىق جيناۋعا دەيىنگى كەزەڭدەرىن قامتيتىن ۇساقبولشەكتى وندىرىس ادىسى. بۇل تاسىل Allur زاۋىتىنا مامانداردىڭ كاسىبي الەۋەتىن ارتتىرۋعا جانە وندىرىستى تەرەڭدەتۋگە مۇمكىندىك بەرەدى.

جاڭا وندىرىستىك جەلىنىڭ قۋاتى — جىلىنا 15 مىڭ كولىك. جوبا اياسىندا 1000-نان استام ادام جۇمىسقا تارتىلادى. ال جالپى Allur كومپانيياسى 5000-نان استام ادامدى جۇمىسپەن قامتىپ وتىر.

قازىرگى تاڭدا Allur قازاقستانداعى اۆتوكولىك وندىرىسىنىڭ 61 پايىزىن, ساتىلىمنىڭ 38 پايىزىن قامتاماسىز ەتەدى. ال Jetour X70 Plus مودەلى ەلىمىزدە ەڭ كوپ ساتىلعان قىتايلىق كولىك اتاندى — 2025 جىلدىڭ العاشقى توقسانىندا 726 دانا ساتىلعان.

كومپانييا مەن Jetour اراسىنداعى ارىپتەستىك اياسىندا قوستانايدا تمد ەلدەرىنە ارنالعان حالىقارالىق وقۋ ورتالىعى اشىلماق. بۇل ورتالىق تەحنيكالىق قىزمەت كورسەتۋ مەن ساتىلىم سالاسىنا ماماندار دايىنداۋمەن اينالىسادى. جوبا كورشى ەلدەرگە دە ەكسپورتتالماق.

مينيسترلىك بۇل جوبانىڭ ونەركاسىپتەگى لوكاليزاتسييانى ارتتىرىپ, جاڭا جۇمىس ورىندارىن اشۋدا ماڭىزى زور ەكەنىن اتاپ وتتى.