Инженер болғысы келетін жастар үшін керемет жаңалық! Сәтбаев университеті мен әлемдік үздік техникалық оқу орындарының бірі – Колорадо тау-кен мектебі инженер мамандарды бірлесіп даярлауға келісім жасады, деп хабарлайды Shalqar.kz.

Жаңа бағдарлама аясында студенттер Қазақстан мен АҚШ-та оқып, қос диплом алып шығады. Бұл 3+1+1 форматы бойынша жүзеге асады: үш жыл – Сәтбаевта, бір жыл – Колорадо тау-кен мектебінде, тағы бір жыл – магистратура. Сонымен қатар екі университет бірлескен ғылыми-зерттеу жобаларын дамытпақ.

Келісімге АҚШ-та өткен ресми кездесуде Сәтбаев университетінің Халықаралық ынтымақтастық және стратегиялық даму жөніндегі проректоры Самғат Ермекбаев пен Колорадо тау-кен мектебінің жаһандық бастамалар жөніндегі вице-президенті Джон Брэдфорд қол қойды.

Неге бұл маңызды?
 • Колорадо тау-кен мектебі – дүниежүзіндегі №1 тау-кен инженериясы оқу орны (QS рейтингі, 2025).
 • Университет таза теория емес, нақты өндірістік тәжірибе беретін бағдарламаларымен танымал.
 • Студенттер халықаралық жобаларға қатыса отырып, әлемдік деңгейдегі инженерлермен бірге жұмыс істеуге мүмкіндік алады.