Алматы метросында енді банк картасы немесе смартфонмен төлеу бұрынғыдан да жеңіл болмақ. Қаланың басты көлік желісінде турникеттер толық жаңартылып, 2025 жылдың күзіне қарай барлық станцияларда байланыссыз төлем жасау мүмкіндігі қолжетімді болады, деп хабарлайды Shalqar.kz.

Бұрын банк картасымен төлеу үшін арнайы турникетке немесе кассаға бару қажет болса, енді әрбір турникет заманауи құрылғымен жабдықталады. Бұл жаңашылдық жолаушылардың уақытын үнемдеп қана қоймай, метродан өту процесін әлдеқайда жылдамдатады.

“Картаңыз немесе смартфоныңыз болса жеткілікті” – жетон іздеп сабылудың, ұзын-сонар кезекте тұрудың қажеті болмайды. Жолақыны бір ғана қимылмен төлеу – қала тұрғындары мен қонақтарының өмірін жеңілдетпек.

Әкімдіктің айтуынша, бұл өзгеріс Алматының көлік инфрақұрылымын жаңғырту аясында жүзеге асып отыр. Мақсат – қоғамдық көлік сапасын көтеріп, мегаполистегі жолаушыларға барынша жайлы жағдай жасау.