الماتى مەتروسىندا ەندى بانك كارتاسى نەمەسە سمارتفونمەن تولەۋ بۇرىنعىدان دا جەڭىل بولماق. قالانىڭ باستى كولىك جەلىسىندە تۋرنيكەتتەر تولىق جاڭارتىلىپ, 2025 جىلدىڭ كۇزىنە قاراي بارلىق ستانتسييالاردا بايلانىسسىز تولەم جاساۋ مۇمكىندىگى قولجەتىمدى بولادى, دەپ حابارلايدى Shalqar.kz.

بۇرىن بانك كارتاسىمەن تولەۋ ۇشىن ارنايى تۋرنيكەتكە نەمەسە كاسساعا بارۋ قاجەت بولسا, ەندى اربىر تۋرنيكەت زاماناۋي قۇرىلعىمەن جابدىقتالادى. بۇل جاڭاشىلدىق جولاۋشىلاردىڭ ۋاقىتىن ۇنەمدەپ قانا قويماي, مەترودان وتۋ پروتسەسىن الدەقايدا جىلدامداتادى.

“كارتاڭىز نەمەسە سمارتفونىڭىز بولسا جەتكىلىكتى” – جەتون ىزدەپ سابىلۋدىڭ, ۇزىن-سونار كەزەكتە تۇرۋدىڭ قاجەتى بولمايدى. جولاقىنى بىر عانا قيمىلمەن تولەۋ – قالا تۇرعىندارى مەن قوناقتارىنىڭ ومىرىن جەڭىلدەتپەك.

اكىمدىكتىڭ ايتۋىنشا, بۇل وزگەرىس الماتىنىڭ كولىك ينفراقۇرىلىمىن جاڭعىرتۋ اياسىندا جۇزەگە اسىپ وتىر. ماقسات – قوعامدىق كولىك ساپاسىن كوتەرىپ, مەگاپوليستەگى جولاۋشىلارعا بارىنشا جايلى جاعداي جاساۋ.