جاز كەلدى – دەمالىس ۋاقىتى عانا ەمەس, وزىن-وزى دامىتۋ مەن العاشقى تابىس تابۋدىڭ دا تاماشا كەزەڭى. ەڭبەك جانە حالىقتى الەۋمەتتىك قورعاۋ مينيسترى سۆەتلانا جاقىپوۆانىڭ ايتۋىنشا, بيىل مەكتەپ وقۋشىلارى مەن ستۋدەنتتەرگە تۇرلى سالالاردا جۇمىس ىستەۋگە جانە جاڭا داعدىلاردى مەڭگەرۋگە ناقتى مۇمكىندىكتەر قاراستىرىلعان, دەپ حابارلايدى Shalqar.kz.

مينيستردىڭ دەرەگىنشە, ەلىمىزدە 14 پەن 18 جاس ارالىعىندا جۇمىس ىستەۋگە رۇقسات ەتىلگەن 1,5 ميلليونعا جۋىق وقۋشى بار. ونىڭ ىشىندە 26 مىڭنان استامى – مۇمكىندىگى شەكتەۋلى جاستار. جۇمىس ىستەۋگە بەيىلدى وقۋشىلاردىڭ كوبى تۇركىستان, الماتى, جامبىل وبلىستارىندا جانە الماتى قالاسىندا شوعىرلانعان.

قازىردىڭ وزىندە 24 مىڭنان استام وقۋشى ساۋدا جانە تاماقتانۋ سالاسىندا ەڭبەككە ارالاسىپ ۇلگەرگەن. ال جازعى دەمالىس كەزىندە جاستاردىڭ بەلسەندىلىگىن ارتتىرۋ ماقساتىندا بىرنەشە باستاما قولعا الىنباق.

جاستارعا ارنالعان باستى مۇمكىندىكتەر:
 • enbek.kz پورتالىندا “مەنىڭ جازعى دەمالىسىم” بولىمى اشىلدى. مۇندا وقۋشىلار مەن ستۋدەنتتەر تىركەلىپ, تۇيىندەمە جاساپ, جۇمىس ىزدەي الادى. 16 جاسقا دەيىنگىلەر ۇشىن اتا-اناسى نەمەسە قامقورشىسى ارقىلى تىركەۋ جۇرگىزىلەدى.
 • Skills.Enbek ونلاين پلاتفورماسىندا 1000-نان استام كۋرس قولجەتىمدى. ونىڭ 322-سى تەگىن, 137-سى قازاق تىلىندە. جاستار بۇل كۋرستار ارقىلى ىت, ديزاين, ماركەتينگ, قارجى سىندى سالالاردا بىلىمىن جەتىلدىرە الادى.
 • قوعامدىق جۇمىستار مەن كاسىپتىك باعدار بەرەتىن جوبالار ىسكە قوسىلادى. بۇل شارالار جاستاردى ەڭبەككە باۋلىپ قانا قويماي, بولاشاق ماماندىقتارىن تاڭداۋعا باعىت بەرەدى.