22 مامىر كۇنى تاڭعى ساعات 9:00-دە قازاقستاننىڭ بارلىق وڭىرىندە دابىل جۇيەلەرى ىسكە قوسىلادى. بىراق الاڭداۋعا نەگىز جوق – بۇل جوسپارلى وقۋ-جاتتىعۋ, دەپ حابارلايدى Shalqar.kz.

«ورت-2025» رەسپۋبليكالىق كوماندالىق-شتابتىق وقۋ-جاتتىعۋى اياسىندا ەسكەرتۋ جۇيەسىنىڭ جۇمىسىن تەكسەرۋ ماقساتىندا دابىل بەلگىسى بەرىلەدى. بۇل جاتتىعۋ ازاماتتىق قورعاۋ سالاسىنداعى بارلىق قۇرىلىمداردىڭ توتەنشە جاعداي كەزىندەگى ۇيلەسىمدى ارەكەتىن پىسىقتاۋعا باعىتتالعان.

بيىلعى وقۋ-جاتتىعۋدىڭ باسقارۋ جانە ۇيلەستىرۋ ورتالىعى پاۆلودار وبلىسىندا ورنالاسقان. وسى وڭىر وقۋ-جاتتىعۋ بارىسىنداعى نەگىزگى ىس-قيمىلداردىڭ الاڭىنا اينالادى.

شارا شەڭبەرىندە شەكارا ماڭىنداعى ورمان جانە دالا ورتتەرىن سوندىرۋ تاكتيكاسى دا پىسىقتالادى. بۇل جۇمىستارعا رەسەي فەدەراتسيياسىنىڭ توتەنشە جاعدايلار مينيسترلىگىنىڭ ماماندارى مەن ارنايى تەحنيكالارى جۇمىلدىرىلماق.

توتەنشە جاعدايلار قىزمەتى تۇرعىنداردان ۇرەيگە بوي الدىرماي, سابىر ساقتاۋىن سۇرايدى. بۇل – جوسپارلى تەكسەرىس ەكەنىن ەسكەرىڭىز. ەشقانداي قاۋىپ جوق.