قازاقستاندا 22 مامىر مەن 1 ماۋسىم ارالىعىندا العاش رەت حالىقارالىق بالالاردى قورعاۋ كۇنىنە ارنالعان ۇلتتىق اۋقىمداعى ناۋقان وتۋدە. «قازاقستان بالالارى» دەپ اتالعان بۇل باستاما – مەملەكەت باسشىسى قاسىم-جومارت توقاەۆتىڭ ۇلتتىق قۇرىلتايدا ايتقان تاپسىرماسىنا سايكەس قولعا الىنعان, دەپ حابارلايدى Shalqar.kz تىلشىسى سىرتقى ىستەر مينيسترلىگىنە سىلتەمە جاساپ.

پرەزيدەنت اتاپ وتكەندەي, بالالارعا قامقور بولۋ – بارشا قوعامنىڭ ورتاق مىندەتى. بۇل ناۋقاننىڭ نەگىزگى ماقساتى – بالالاردىڭ قاۋىپسىز, مەيىرىمدى ورتادا ومىر سۇرۋىنە جاعداي جاساۋ, بالا قۇقىعىن قورعاۋ مەن ولاردىڭ ماسەلەلەرىنە قوعام نازارىن اۋدارۋ.

مەرەكە الدىنداعى ىس-شارالار «اكەم – تىرەگىم, انام – جۇرەگىم» ۇرانىمەن باستالدى. قر مادەنيەت جانە اقپارات مينيسترلىگىنىڭ ۇيىمداستىرۋىمەن وتكەن بۇل ناۋقان وتباسى رولىن ايقىنداۋعا باعىتتالعان.

ەلىمىزدىڭ بارلىق وڭىرىندە:
 • تەاترلىق جانە كونتسەرتتىك باعدارلامالار
 • بالالارعا ارنالعان سپورتتىق جارىستار مەن شىعارماشىلىق بايقاۋلار
 • مۋزەيلەر مەن كىتاپحانالاردا ارنايى كورمەلەر
 • وتباسىن قولداۋ ورتالىقتارىندا اشىق ەسىك كۇندەرى وتتى.

العاشقى كۇننىڭ وزىندە «قازاقستان بالالارى» ناۋقانىنا ەل بويىنشا جارتى ميلليوننان استام ادام قاتىسىپ, قوعامنىڭ بالا بولاشاعىنا بەي-جاي قارامايتىنىن كورسەتتى.