NASA-نىڭ Perseverance روۆەرى مارستاعى تىلسىم تابيعات قۇبىلىسىن كادرعا تۇسىرىپ, ەرەكشە سەلفي جاسادى. بۇل وقيعا قىزىل پلانەتاداعى زەرتتەۋلەرگە جاڭاشا سەرپىن بەرىپ وتىر, دەپ حابارلايدى Shalqar.kz Associated Press سىلتەمە جاساپ.

سۋرەتتە روۆەردىڭ ارت جاعىندا شاڭدى قۇيىن – مارستىق “تورنادو” انىق كورىنەدى. بۇل قۇبىلىس اپپاراتتان نەبارى 5 شاقىرىم جەردە ورىن العان. NASA مالىمەتىنە سۇيەنسەك, بۇل كادر روۆەردىڭ روبوت قولىنداعى كامەرامەن تۇسىرىلگەن 59 جەكە سۋرەتتى بىرىكتىرۋ ارقىلى الىنعان. بۇكىل پروتسەسكە بىر ساعاتتاي ۋاقىت كەتكەن.

– ارتقى جاقتاعى شاڭدى دۇلەي بۇل سۋرەتتى ەرەكشە عانا ەمەس, ونى كلاسسيكالىق تۋىندىعا اينالدىرادى, – دەيدى سۋرەتتى قۇراستىرعان Malin Space Science Systems كومپانيياسىنىڭ ۆيزۋاليزاتسييا مامانى مەگان ۆۋ.

كادردا Perseverance بۇرعىلاپ جاتقان سوڭعى جىنىس ۇلگىسى دە كورىنىس تاپقان. بۇل – روۆەردىڭ مارستاعى 1500-شى, ال جەر ۋاقىتىمەن 1541-شى كۇنى.

ايتا كەتەيىك, قازىر اپپاراتتىڭ بەتى قىزىل شاڭعا تولى – بۇل ۇزاق زەرتتەۋ جۇمىستارىنىڭ ايعاعى. 2020 جىلى ۇشىرىلعان Perseverance قازىرگى تاڭدا ەزەرو كراتەرىندە – ەجەلگى وزەن ارناسىندا زەرتتەۋ جۇرگىزىپ, بولاشاقتا جەرگە جەتكىزىلۋى مۇمكىن ۇلگىلەردى جيناۋدا.