NASA-nıñ Perseverance roveri Marstağı tılsım tabiğat qwbılısın kadrğa tüsirip, erekşe selfi jasadı. Bwl oqiğa qızıl planetadağı zertteulerge jañaşa serpin berip otır, dep habarlaydı Shalqar.kz Associated Press silteme jasap.

Surette roverdiñ art jağında şañdı qwyın – marstıq “tornado” anıq körinedi. Bwl qwbılıs apparattan nebäri 5 şaqırım jerde orın alğan. NASA mälimetine süyensek, bwl kadr roverdiñ robot qolındağı kameramen tüsirilgen 59 jeke suretti biriktiru arqılı alınğan. Bükil proceske bir sağattay uaqıt ketken.

– Artqı jaqtağı şañdı düley bwl suretti erekşe ğana emes, onı klassikalıq tuındığa aynaldıradı, – deydi suretti qwrastırğan Malin Space Science Systems kompaniyasınıñ vizualizaciya mamanı Megan Vu.

Kadrda Perseverance bwrğılap jatqan soñğı jınıs ülgisi de körinis tapqan. Bwl – roverdiñ Marstağı 1500-şi, al Jer uaqıtımen 1541-şi küni.

Ayta keteyik, qazir apparattıñ beti qızıl şañğa tolı – bwl wzaq zertteu jwmıstarınıñ ayğağı. 2020 jılı wşırılğan Perseverance qazirgi tañda Ezero kraterinde – ejelgi özen arnasında zertteu jürgizip, bolaşaqta Jerge jetkizilui mümkin ülgilerdi jinauda.