ەلىمىزدىڭ ەڭ ۇزدىك بىلىم وشاقتارى بەلگىلى بولدى. 2024–2025 وقۋ جىلىنىڭ قورىتىندىسى بويىنشا قازاقستاننىڭ 100 ۇزدىك مەكتەبى انىقتالدى, دەپ حابارلايدى Shalqar.kz.

بۇل تىزىمدى قر وقۋ-اعارتۋ مينيسترلىگىنىڭ بىلىم سالاسىندا ساپانى قامتاماسىز ەتۋ كوميتەتى جان-جاقتى تالداۋ نەگىزىندە جاساپ شىعاردى. مەكتەپتەردىڭ رەيتينگى بىلىم ساپاسىن سىرتتاي باعالاۋ, PISA زەرتتەۋلەرىنە قاتىسۋ دەڭگەيى, وقۋشىلار جەتىستىگى, مۇعالىمدەردىڭ بىلىكتىلىگى, ينكليۋزيۆتى بىلىم بەرۋ, عىلىمي جانە الەۋمەتتىك جوبالارداعى بەلسەندىلىك, تاربيە جۇمىسىنىڭ تيىمدىلىگى مەن مەكتەپتەگى احۋال سيياقتى بىرقاتار كريتەرييلەر بويىنشا باعالانعان.

– بۇل تىزىم – جاي عانا ۇزدىك مەكتەپتەر جيىنتىعى ەمەس. بۇل – ار بالانىڭ قابىلەتىن اشۋعا كۇش سالاتىن مۇعالىمدەردىڭ, مەكتەپ اكىمشىلىگىنىڭ, اتا-انالار مەن وقۋشىلاردىڭ ۇيلەسىمدى ەڭبەگىنىڭ كورىنىسى. ار بالا بىلىم الاتىن ورنىنا سەنىپ, شابىتتانىپ, وز الەۋەتىن اشا بىلۋى تيىس, – دەدى كوميتەت توراعاسىنىڭ ورىنباسارى مايرا مەلدەبەكوۆا.

ايتا كەتەيىك, ەلىمىزدە 8 مىڭعا جۋىق مەكتەپ بار. وندا 3,9 ميلليوننان استام وقۋشى بىلىم الىپ, 412 مىڭ پەداگوگ ەڭبەك ەتۋدە. ۇزدىك 100 مەكتەپ تىزىمىن انىقتاۋ باستاماسى الداعى جىلدارى دا جالعاسىپ, تۇراقتى رەيتينگكە اينالماق.